„გია გაჩეჩილაძეს თავის დროზე აქვს გაყიდული „მაესტროს“ წილის 25%, ანუ ის 55%-ის მფლობელი კი არაა, 30%-ის მფლობელია“, - „მაესტროს“ გენერალური დირექტორი ბაია გადაბაძე აცხადებს, რომ წილის საკითხი ჯერ ისევ სადავოა.
გადაბაძის თქმით, შესაბამისი დოკუმენტები მას ხელთ აქვს.
„დღეს მამუკა ღლონტის ადვოკატმა ეჭვქვეშ დააყენა გია გაჩეჩილაძის 25%. არსებობს ამისი წინარე ნასყიდობის ხელშეკრულება, სადაც წერია, რომ გიამ გაყიდა თავისი წილი, ეს წილი გადაუფორმა მამუკა ღლონტს, ეკა აკობიას და იმ ძველ დამფუძნებლებს, რომლებმაც ახლა გაყიდეს. არსებობს ასეთი ჩანაწერი, რომ რადგანაც წილს ედო ყადაღა, ყადაღის გასვლისთანავე ის ავტომატურად უნდა გადაფორმებულიყო ამ ადამიანებზე. გავიდა ყადაღა, მოიხსნა, მაგრამ გიამ გადაიფიქრა. მამუკა ღლონტის ადვოკატი აყენებს კითხვის ნიშნის ქვეშ ამას. ეს ყველაფერი ჯერ სასამართლო დავაშია. ჯერ გაირკვეს მფლობელი, ხოლო იმან შემდეგ გადამაყენოს მე“, - განაცხადა ბაია გადაბაძემ.
ტელეკომპანიის პარტნიორთა კრებამ „მაესტროს“ დირექტორის ბაია გადაბაძის მოხსნის გადაწყვეტილება მიიღო. ამის შესახებ ჟურნალიტებს კრების მიმდინარეობისას მაკა ასათიანის ადვოკატმა, გიორგი გვენეტაძემ განუცხადა.
როგორც მან აღნიშნა, პარტნიორებმა არ გაითვალისწინეს არც ერთი არგუმენტი და 55%-ის მფლობელმა მიიღო დამოუკიდებელი გადაწყვეტილება.
მისივე თქმით, დირექტორის მოვალეობას ლევან გაჩეჩილაძე შეასრულებს.
ადვოკატის თქმით, ჯერ უცნობია გაასაჩივრებს თუ არა ბაია გადაბაძე აღნიშნულ გადაწყვეტილებას.
კრებაზე გამოცხადებული შესვენების დროს დარბაზი კომენტარის გარეშე ერთად დატოვეს ძმებმა გაჩეჩილაძეებმა და ბაია გადაბაძემ. კრება სხვა საკითხებით რამდენიმე წუთში განახლდება.
პარტნიორთა კრებაზე ბაია გადაბაძის მოხსნის საკითხის განხილვა გია გაჩეჩილაძემ მოითხოვა. გია გაჩეჩილაძე ტელეკომპანია „მაესტროს“ 55%-იანი წილის მფლობელი 1 თებერვალს გახდა.