მოსამართლე ნათია გუჯაბიძის შემდეგ თბილისის სააპელაციო სასამართლოში მიმდინარე პროცესზე „რუსთავი 2-ის“ ამჟამინდელი მეპატრონის მხარემ მოსამართლეთა კოლეგიის კიდევ ერთი წევრის, შორენა ყაველაშვილის აცილების შუამდგომლობა დააყენა.
„რუსთავი 2-ის“ გენერალურმა დირექტორმა, ნიკა გვარამიამ შორენა ყაველაშვილის აცილებისთვის მთავარ არგუმენტად შემდეგი რამ დაასახელა: „ჩემს ინტერესშია მიუკერძოებელი მართლმსაჯულება. ქალბატონი შორენა იყო იმ კოლეგიაში, რომელმაც წამდენიმე წლის წინ მიიღო გამამართლებელი განაჩენი ჩემ მიმართ. ეს მაფიქრებინებს, რომ ის შესაძლოა, არ იყოს ამ საქმეში ობიექტური... ამ ვითარებაში, როდესაც ქალბატონ მოსამართლეს ჩემს საქმეში გადაწყვეტილება აქვს მიღებული, ის ჩანაცვლდეს გარეგნული დამკვირვებლის, უფრო ნეიტრალური და ჩემთან დაუკავშირებელი მოსამართლით“.
მოსამართლე ყაველაშვილმა თვითაცილება ამ შუამდგომლობაზე არ გამოიყენა. მან აღნიშნა, რომ „გამამართლებელი განაჩენის გამოტანასთან არანაირ კავშირში არ არის პირადი სიმპათია. ეს მიღებული იყო იმ მტკიცებულებებზე დაყრდნობით, რაც საქმეში იყო წარმოდგენილი, ასევე არ ვაპირებ, ამ საქმესთან დაკავშირებით რომელიმე მხარის მიმართ პირადი სიმპათიების მიხედვით მივიღო გადაწყვეტილება. თვითაცილებას არ ვიყენებ“.
მოსამართლეთა კოლეგიამ ყაველაშვილის აცილების შესახებ შუამდგომლობა არ დააკმაყოფილა.