სტამბოლში საქართველოს გენერალური საკონსულოს ინფორმაციით, მგზავრთა პირველი ნაკადი სტამბოლიდან თბილისის მიმართულებით ათათურქის საერთაშორისო აეროპორტიდან თურქეთის დროით 18.10 საათზე გამოფრინდება.

საქართველოს საგარეო საქმეთა სამინისტროს ინფორმაციით, საკონსულო საქართველოს იმ მოქალაქეებს მიმართავს, რომლებიც საქართველოში დაბრუნებას ათათურქის აეროპორტიდან ინდივიდუალური გზებით გეგმავენ და მოუწოდებს, დიდი რიგების გათვალისწინებით, დადგენილ დროზე რამდენიმე საათით ადრე გამოცხადდნენ ათათურქის საერთაშორისო აეროპორტში.

„თბილისის მიმართულებით მგზავრების გადაყვანას ახორციელებს ავიაკომპანია „Turkish Airlines” და ავიაკომპანია „Atlasglobal”. მათ შორის ავიაკომპანია „Atlasglobal” აწარმოებს მოლაპარაკებას შესაბამის სამსახურებთან მგზავრთა რაოდენობის ერთიანად გადმოყვანის მიზნით. იმ შემთხვევაში, თუ კომპანია „Atlasglobal” ვერ მოახერხებს ყველა მგზავრის თბილისში დღეს დაბრუნებას, მათ ავიაკომპანიის ხარჯით დააბინავებენ სასტუმროში და გამოამგზავრებენ უახლოესი რეისით.

სტამბოლში საქართველოს გენერალურმა საკონსულომ უკვე უზრუნველყო საქართველოს იმ მოქალაქეების გადაყვანა აეროპორტში, ვინც დახმარებისთვის მიმართა საკონსულოს. დღესვე თბილისის მიმართულებით შესრულდება კიდევ ორი რეისი თურქეთის დროით 21.10 საათზე და 01:40 საათზე.

საქართველოს საგარეო საქმეთა სამინისტრო მოუწოდებს საქართველოს მოქალაქეებს დამატებითი ინფორმაციის მიღების მიზნით დაუკავშირდნენ ცხელ ხაზზე საქართველოს გენერალურ საკონსულოს ქ. სტამბოლში (+90 541) 818 44 00, საქართველოს საელჩოს ქ. ანკარაში (+90 312) 690-30-40), ასვე საქართველოს გენერალურ საკონსულოს ქ. ტრაბზონში (+90 541) 326-22-26; ამასთან შეგახსენებთ, რომ ქ. სტამბოლში ისევე როგორც თურქეთის მთელ ტერიტორიაზე უსაფრთხოების დონე უმაღლეს დონეზეა აყვანილი, საქართველოს საგარეო საქმეთა სამინისტრო თურქეთში მყოფ საქართველოს მოქალაქეებს მოუწოდებს თავი შეიკავონ ხალხმრავალ ადგილებში გადაადგილებისაგან" - ნათქვამია განცხადებაში.