"გვასუნთქეთ ჰაერი და არა საწამლავი", - ამ მოთხოვნით პარლამენტის შენობის წინ მოქალაქეები შეიკრიბნენ. აქციის მონაწილეების თქმით, ხელისუფლებას კონსტიტუციური უფლების დაცვას - ჯანმრთელობისთვის უსაფრთხო გარემოში ცხოვრების რეალიზებას სთხოვენ.
მათი თქმით, მსოფლიო ჯანდაცვის ორგანიზაციის უკანასკნელი კვლევის მიხედვით საქართველო ჰაერის დაბინძურებით გამოწვეული სიკვდილიანობით პირველ ადგილზეა. ამიტომ მთავრობისა და თბილისის მერიისგან შესაბამისი ზომები მიღებას ითხოვენ.
აქციის მონაწილეები მთავრობისგან ითხოვენ, შეიქმნას ჰაერის ხარისხის გაუმჯობესების სამოქმედო გეგმა, გადაიდგას შესაბამისი ნაბიჯები ავტომობილების ტექდათვალიერების დასანერგად, დაწესდეს გამონაბოლქვის მონიტორინგი საზოგადეობრივი ტრანსპორტისთვის, დაიწყოს საწვავის მონიტორინგი, დაწესდეს რეგულაციები და სტანდარტები სამშენებლო მოედნებიდან მტვრის და ხმაურის გავრცელების კონტროლისთვის, გამკაცრდეს კანონაღსრულება საფეხმავავლო ზონებში ავტომანქანების პარკირებასთან დაკავშირებით, ასევე, ამოქმედდეს და ქალაქის გენერალურ გეგმაში აისახოს გარემოსდაცვითი სტრატეგია.
თბილისის მერიისგან კი აქციის მონაწილეები ითხოვენ, შეწყდეს საღი ხეების ჭრაზე ნებართვის გახემა ნებისმიერი მიზეზით, დაავადებული ხეების ფიტოსანიტარული ჭრის შემდეგ, დაირგოს ის ხეები, რომელთაც რეკომენდაციას გაუწევენ სპეციალისტები, ხოლო ტენდერებში მონაწილეობის საშუალება ყველა სანერგეს უნდა ჰქონდეს, შეიქმნას უსაფრთხო ტროტუარები, ველოსადგურები და ველობილიკები, ასევე, გაუმჯობესდეს პარკინგის რეგულაციები.
"პარტიზანული მებაღეობა თბილისში" ორგანიზებით ჩატარებულ აქციაზე მონაწილეებმა მიმართვები გაავრცელეს და ხელმოწერები შეაგროვეს.