გიულენის დაფინანსებული სკოლები უმეტეს შემთხვევაში აკრედიტებულია ჩვენი კანონმდებლობის შესაბამისად, ქართულ ენაზე მიდის სწავლება ჩვენი პროგრამების მიხედვით. შესაბამისად, არანაირი ინფორმაცია იმის შესახებ, რომ ტერორიზმთან ან სხვა სახის უკანონობასთან ჰქონდეს კავშირი ამ სკოლებს, აქამდე არ ყოფილა, - ამის შესახებ განათლების მინისტრმა, ალექსანდრე ჯეჯელავამ განაცხადა.
მისი თქმით, ხვალ თურქეთში იგეგმება პრემიერ-მინისტრ გიორგი კვირიკაშვილის ვიზიტი, სადაც დელეგაციაში თავადაც იქნება. მისი თქმით, შეხვედრაზე ერთ-ერთ საკითხად აღნიშნულ სკოლებსაც განიხილავენ.
„ჩვენთვის მნიშვნელოვანია, ერთი მხრივ სტრატეგიულ პარტნიორთან მეგობრობას არაფერი ართულებდეს. მეორე მხრივ მნიშვნელოვანია, რომ ობიექტურად შევაფასოთ ვითარება და ერთი ადამიანის განცხადებაზე არ ავაგოთ გადაწყვეტილება",- განაცხადა ჯეჯელავამ.
მინისტრის თქმით, სკოლებთან დაკავშირებით თუ მართლა აღმოჩნდა მტკიცებულებები ტერორიზმთან ან სხვა უკანონობაში ბავშვების ჩართვის შესახებ, შესაძლოა სისხლის სამართლის დევნის საფუძველიც გახდეს. „თუმცა ამ დროისთვის ასეთი მტკიცებულებები არ გვაქვს", - აცხადებს ჯეჯელავა.
ბათუმში თურქეთის გენერალური კონსულის განცხადებით, ბათუმის შაჰინის სახელობის მეგობრობის ლიცეუმში, ბავშვებს ტერორისტული იდეოლოგიით ზრდიან, - ამის შესახებ, იასინ თემისქანმა, საზოგადოებრივი მაუწყებლის აჭარის ტელევიზიისთვის მიცემულ ინტერვიუში ისაუბრა.
კონსული მშობლებს მოუწოდებს, ბავშვები აღნიშნულ სასწავლო დაწესებულებას მოარიდონ. იასინ თემისქანი განმარტავს, რომ სკოლა-ლიცეუმი, ტერორისტული დაჯგუფებების ქოლგის ქვეშ იმართება და ამავე იდეოლოგიით იზრდებიან. კონსულის ინფორმაციით, სკოლა, ტერორისტ ფეთულა გიულენის ორგანიზაციის საგანმანათლებლო დაწესებულებების ქსელის ნაწილია.
