მასწავლებელთა საგნის გამოცდები 8 ივლისს დაიწყო და 13 ივლისს დასრულდა. გამოცდებზე სულ 22 700-ზე მეტი აპლიკანტი დარეგისტირდა. შეფასებისა და გამოცდების ეროვნული ცენტრის ინფორმაციით, გამოცდებზე დაახლოებით 16 500-ზე მეტი აპლიკანტი (73%) გამოცხადდა.

2016 წლის აპრილის მონაცემებით, საქართველოში სულ 65 107 პედაგოგია. მათგან პრაქტიკოსი მასწავლებლის სტატუსი 47 943-ს აქვს. ამ მონაცემებზე დაყრდნობით, საგნის გამოცდაზე, სავარაუდოდ, პედაგოგების 30%-ზე მეტი გავიდა. ეს ციფრი მიახლოებითია, ვინაიდან საგნის გამოცდებს პედაგოგებთან ერთად მასწავლებლობის მსურველი აპლიკანტები აბარებდნენ. ჯერჯერობით, ცნობილი არ არის სტატისტიკური მონაცემები, დარეგისტირებულთაგან სულ რამდენი მასწავლებლობის მსურველი აბარებდა გამოცდას.

ცენტრის მიერ მოწოდებული ინფორმაციის თანახმად, საგნების მიხედვით, პირველადი მონაცემებით, გამოცდაზე გამოცხადებულ აპლიკანტთა რაოდენობა ასეთია:

შეფასებისა და გამოცდების ცენტრში, ჯერჯერობით, ვერ ასახელებენ კონკრეტულ თარიღს, თუ როდიდან გახდება გამოცდის შედეგები ცნობილი. ამ ეტაპზე ნაშრომების გასწორება მიმდინარეობს.

თუ პრაქტიკოსი მასწავლებელი 3 წლის განმავლობაში ვერ ჩააბარებს საგნის გამოცდას, სკოლა ვალდებულია, მასთან შრომითი ურთიერთობა გაწყვიტოს.სქემის მიხედვით, პედაგოგებს, რომლებმაც პირველ ცდაზე ზღვარი ვერ გადალახეს, კიდევ 5-ჯერ შეეძლებათ საგნობრივ გამოცდაზე გასვლა.

მასწავლებლის საგნის გამოცდა წელიწადში ორჯერ ტარდება,ზამთარსა და ზაფხულში.

იმისათვის, რომ პრაქტიკოს პედაგოგს უფროსი მასწავლებლის სტატუსი მიენიჭოს, 4 წლის განმავლობაში 19 კრედიტქულა უნდა დააგროვოს. საგნის გამოცდას 10 ქულა ეთმობა.

პრაქტიკოსი მასწავლებლების საგნობრივ გამოცდაზე, მიმდინარე წლის იანვარში, სულ 10 552 პრაქტიკოსი პედაგოგი დარეგისტრირდა. მათგან ტესტირება 6 477-მა გაიარა. მინიმალური კომპეტენციის ზღვარი კი, რომელიც 60%-ით განისაზღვრებოდა, 1 101-მა გადალახა, ანუ საერთო რაოდენობის თითქმის 17%-მა. 83%-მა კი ზღვარი ვერ გადალახა.

მასწავლებლის საქმიანობის დაწყების, პროფესიული განვითარებისა და კარიერული წინსვლის  სქემა მთავრობამ 2015 წლის თებერვალში დაამტკიცა. სქემის თანახმად, პედაგოგებმა ერთი სტატუსიდან მეორეზე გადასასვლელად კრედიტები სხვადასხვა აქტივობით უნდა დააგროვონ. კრედიტების რაოდენობა საფეხურების მიხედვით განსხვავებულია. 

2016 წლის აპრილის მონაცემებით, ქვეყანაში სულ 47 943 პრაქტიკოსი პედაგოგია, 16 274- უფროსი, ხოლო 199 წამყვანის სტატუსის მქონე პედაგოგი. დღესდღეობით სისტემაში არ გვყავს მენტორის სტატუსის მქონე პედაგოგი.