„ქალის და მამაკაცის კოსტიუმი, წყვილი, 2000 ლარი დაჯდა. მარტივი მათემატიკით თუ დავიანგარიშებთ, თუ ორი კოსტიუმი 2000 ლარი დაჯდა, თითო დაჯდა 1000 ლარი“, - ამის შესახებ „ლიბერალს“ საქართველოს ეროვნული ოლიმპიური კომიტეტის პრესსამსახურში განუცხადეს.

მათი თქმით, ქართველი ოლიმპიელებისთვის ჯამში 80 კოსტიუმი შეიკერა, აქედან ქალებისთვის - 14.

პრესსამსახურის განმარტებით, კოსტიუმის სამი ვარიანტია შექმნილი.

„ერთ-ერთი ატრიბუტი იყო პიჯაკი, ხოლო მეორე და მესამე ვარიანტი, რომელზეც მუშაობენ, ე.წ. წელსაკრავი, რომელიც აჭარულისას ჰგავს, მესამე ფორმას ჯერ არ ვამბობთ, როგორი იქნება“, - აცხადებენ პრესსამსახურში.

ოლიმპიური ნაკრების ჩაცმულობის შეცვლის მოთხოვნით მანიფესტი მომზადდა.

„მოვითხოვთ, შეიცვალოს საქართველოს ოლიმპიური ნაკრების ფორმა, რადგანაც პრეზენტაციის შემდეგ ბევრი ადამიანის უკმაყოფილება გამოიწვია, რომელთაც საკმარისი საფუძველი აქვთ, არ მოსწონდეთ არსებული ფორმა. მივმართავთ სპორტისა და ახალგაზრდობის სამინისტროს, ასევე საქართველოს ოლიმპიურ კომიტეტს, რათა თუნდაც არსებული ფორმის გადაკეთება მოხდეს, ისე, როგორც თანამედროვე კულტურულ სახელმწიფოს შეეფერება", - წერია მანიფესტის ტექსტში.