ის ტრაგედიები, რომელზეც თქვენ მიანიშნებთ, არის ძალიან სერიოზული პრობლემა, რომელსაც აკრძალვებით [კაზინოების] ვერ მოვუვლით, - განაცხადა პარლამენტის თავმჯდომარემ, დავით უსუფაშვილმა „პალიტრა ნიუსის“ ეთერში.
„ჩვენ უნდა შევეგუოთ ერთ რამეს, ზრდასრული ადამიანი, სრულწლოვანი ადამიანი, უნდა განაგებდეს თავის ბედს. კაზინოს აკრძალვით, ამას ვერ მივაღწევთ. ტოტალიზატორის განგრევით, აკრძალვით, გაუქმებით, ამას ვერ მივაღწვთ, იმიტომ, რომ უნებისყოფო ადამიანები, რომლებსაც პასუხისმგებლობის განცდა არ აქვთ შვილებზე, მეუღლეზე მშობლებზე, რომლებსაც შეუძლიათ, დედის და მამის პენსია კაზინოში ითამაშონ და წააგონ, ამ ტიპის ადამიანებს ცოტა სხვანაირად უნდა მოვუაროთ. იმიტომ, რომ კაზინოს თუ ავკრძალავთ, ის ამ ფულს წაიღებს და სეკაში წააგებს მეზობელთან“, - განაცხადა უსუფაშვილმა.
მისი თქმით, ის მხარს დაუჭერდა, რომ [კაზინოები] ქალაქებიდან იყოს გატანილი ანუ შეიქმნას მეტი ბარიერი „იმისათვის, რომ შემთხვევით ცუდ ხასიათზე მყოფმა ადამიანმა ან ნაბახუსევმა, უცებ არ შეიაროს კაზინოში“.
რაც შეეხება აზარტული თამაშების რეკლამას, უსუფაშვილმა აღნიშნა, რომ ამ მხრივ კიდევ უფრო მკაცრ რეგულაციაზე შეიძლება საუბარი.
არასრულწლოვნებთან დაკავშირებით უსუფაშვილმა განაცხადა, რომ ეს არის ცალკე თემა, რომელსაც სჭირდება უკეთესი რეგულირება.
მისი თქმით, ონლაინთამაშები არ არის ერთადერთი თემა, რომლისგანაც არასრულწლოვნები უნდა დავიცვათ, როდესაც ინტერნეტსივრცესთან გვაქვს საქმე.
„ეს არის პორნოგრაფია, ძალადობის პროპაგანდა. მას სჭირდება სერიოზული ყურადღება... ამას სჭირდება მშობლების მხრიდანაც ყურადღების მიქცევა“, - აღნიშნა უსუფაშვილმა.
