ტელეკომპანია „მაესტროს" საიას მომზადებული სოციალური რგოლის ეთერში განთავსება დაევალა. შესაბამისი გადაწყვეტილება კომუნიკაციების ეროვნულმა კომისიამ საიას საჩივრის განხილვის შემდეგ მიიღო.
სოციალური რეკლამა, რომლის ეთერში განთავსებასაც საია ითხოვდა, ადრეულ ასაკში ქორწინების უარყოფითი მხარეების შესახებ საზოგადოებრივი ცნობიერების ამაღლებას ისახავს მიზნად.
საიას ინფორმაციით, „მაესტრომ“ რეკლამის განთავსების ოფიციალურ მიზეზად „მაესტროსა" და „საქართველოს ახალგაზრდა იურისტთა ასოციაციას" შორის „ბოლო დროს განვითარებული მოვლენები“ დაასახელა.
„სავარაუდოდ, „მაესტრო“ ბოლო დროს განვითარებულ მოვლენებში გულისხმობდა იმ ფაქტს, რომ საია მწვავედ გამოეხმაურა „მაესტროს“ 32 თანამშრომლისათვის შრომითი ურთიერთობების დაუსაბუთებლად შეჩერების ფაქტს. საია-ს საჩივრის განხილვისას „მაესტროს“ წარმომადგენელმა განმარტა, რომ „მაესტრო“ უარს რეკლამის განთავსებაზე იმიტომ ამბობდა, რომ ვიდეო რგოლი არ წარმოადგენდა სოციალურ რეკლამას.
კომისიამ დაადგინა, რომ საია-ს მომზადებული ვიდეო რგოლი აკმაყოფილებდა სოციალური რეკლამისათვის კანონით დადგენილ მოთხოვნებს; „მაესტრომ“ დაარღვია კანონი, როდესაც უარი განაცხადა რეკლამის ეთერში განთავსებაზე და დაავალა „მაესტროს“ უზრუნველყოს რეკლამის ეთერში გაშვება. კომისიამ ასევე განუმარტა „მაესტროს“ სოციალური რეკლამის განთავსების ვალდებულება და წესი" - ნათქვამია საიას განცხადებაში.