28 ივლისი ჰეპატიტის მსოფლიო დღეა. არასამთავრობო ორგანიზაციების თქმით, კამპანიის წლევანდელი სახელწოდება - „დეკრიმინალიზაციაC“ ეხმიანება კამპანიის წინაშე წელს მდგარ მიზნებს.
მიუხედავად იმისა, რომ 2015 წლიდან საქართველოში C ჰეპატიტის უფასო მკურნალობა გახდა შესაძლებელი, აქციის ორგანიზატორების თქმით, C ჰეპატიტის ელიმინაციის მიზნის მისაღწევად აუცილებელია ნარკოტიკის ინექციური მომხმარებლების 90%-ის მკურნალობის პროგრამაში ჩართვა. არსებული რეპრესიული ნარკოპოლიტიკის პირობებში კი, ამ მიზნის მიღწევა კითხვის ნიშნის ქვეშ დგება.
„წელს კამპანიას ორი ძირითადი მიზანი აქვს: მხარი დაუჭიროს ელიმინაციის პროგრამაში ზიანის შემცირების სერვისების პრიორიტეტიზაციას და გაზარდოს საზოგადოების და გადაწყვეტილების მიმღებთა ინფორმირებულობა ნარკოტიკის მოხმარების დეკრიმინალიზაციის მნიშვნელობაზე ელიმინაციის მისაღწევად", - აცხადებენ აქციის ორგანიზატორები.
კამპანიის ფარგლებში მათ საინფორმაცია მასალებიც გაავრცელეს, რომელიც პაციენტებს C ჰეპატიტის პროგრამაში ჩასართავად დაეხმარება.
აქციის ორგანიზატორები არიან: "ზიანის შემცირების საქართველოს ქსელი", "ნარკოტიკების მომხმარებელთა საქართველოს ქსელი" და GeCAB - პაციენტთა თემის საკონსულტაციო საბჭო.