„ორბი ჯგუფის“ წარმომადგენლის ირაკლი კვერღელიძის თქმით, ყაზბეგის ქუჩაზე კომპანია 1400-ნომრიან სასტუმროს აშენებს. მისივე თქმით, კომპანიას არც ერთი საღი ხე არ მოუჭრია და მერიის სამსახურის ნებართვით ხელმძღვანელობდა.

„რაც შეეხება ხეების მოჭრას. ჩვენ ჩავატარეთ ექსპერტიზა იქ არსებულ ხეებთან დაკავშირებით. კომპანიის სახელწოდება არ მახსოვს, დენდროლოგიური კომპანიაა, რომელიც ამ სფეროში მუშაობს. ეს ტერიტორია არასოდეს ყოფილა რეკრეაციული. ეს იყო ქაოტურად განვითარებული ადგილი. რაც შეეხება ხეებს, ექსპერტიზის შემდეგ, ამორტიზებული ხეების მოჭრის შესაძლებლობა მოგვეცა. ძირითადი ნაწილი იყო ვერხვები, რომელიც ამორტიზებულია და თვითონ მოსახლეობის ინტერესიც იყო მათი მოჭრა. დაახლოებით 30–35 წიწვოვანი საღი ხისთვის ხელი არ მოგვიკიდია. მხოლოდ დაავადებული ხეები მოვჭერით. ჯამში 45 ხე მოიჭრა. არც ერთი არ მოჭრილა ისეთი, რომელზეც ნებართვა გაცემული არ ყოფილა. გარდა ამისა, ინფორმაციისთვის გეტყვით, პროექტში გავითვალისწინეთ რეკრეაციული გამწვანების ზონა, მეოთხე სართულზე გვექნება ღია ვერანდა, სადაც უზრუნველვყოფთ ლანდშაფტის გაშენებას. ასევე ჩვენი სურვილით და საბურთალოს გამგეობასთან შეთანხმებით, უზრუნველვყოფთ სკვერის მოწყობას და გამწვანებას - ქალაქს ნებაყოფლობით საჩუქარს ვუკეთებთ” - განუცხადა „ლიბერალს”  ირაკლი კვერღელიძემ. 

დღეს ყაზბეგის ქუჩის მცხოვრებმა სოციალურ ქსელში ხეების ჭრის ამსახველი ვიდეო გაავრცელა.

თბილისის მერიის ეკოლოგიისა და გამწვანების სამსახურის უფროსის ინფორმაციით, 45 ხეზე, რომელიც დაავადებული, ამორტიზებული და ზეხმელი იყო, მოჭრის ნებართვა გამწვანების სამსახურმა  გასცა. 22 საღ ხეზე კომპანიას უარი ეთქვათ და 5-ზე კი გადარგვის ნებართვა გაიცა.  დღეს გამწვანების სამსახურის უფროსი ყაზბეგის ქუჩაზე იმყოფებოდა. ნინო სულხანიშვილმა ადგილის დათვალიერების შემდეგ “ლიბერალთან” საუბარში საღი ხეების მოჭრა  არ დაადასტურა.

„ვიყავი ადგილზე, მაგრამ ზუსტად ვერაფერს ვიტყვით. რამდენად სწორად არის ეს ხეები მოჭრილი, ამას დავადგენთ. როგორც მოსახლეობა და არასამთავრობო ორგანიზაციები ამბობენ, არსებობს ეჭვი, რომ მოჭრილია საღი ხეები. ხშირია, როცა ხე შეიძლება ვიზუალურად იყოს მწვანე, მაგრამ იყოს დაავადებული, ზუსტად ვერ გეტყვით” - განუცხადა „ლიბერალს” ნინო სულხანიშვილმა.

„პარტიზანული მებაღეობის” ინფორმაციით კი, თბილისში ყაზბეგის ქუჩაზე 13 საღი ხეა მოჭრილი.