გონიოში სამხედრო წვრთნების დროს დაკარგული იაგო შარაძის დედამ შიმშილობა დაიწყო. სამხედროების ძებნა გუშინ საღამოს შეწყდა.
იაგო შარაძის დედას თავდაცვის მინისტრი, ლევან იზორია ტელეფონით ესაუბრა. იაგო შარაძის დედის თქმით, ლევან იზორიამ მას უთხრა, რომ მისი შვილი უკვე დაკარგულად ითვლება და ძებნა არაეფექტური აღმოჩნდა.
იაგო შარაძის ახლობლები თავდაცვის სამინისტროს სთხოვს, რომ გაგრძელდეს ძიება, სხვა შემთხვევაში რადიკალურ ზომებს მიიღებენ.
დღეს თავდაცვის სამინისტრომ განცხადება გაავრცელა, სადაც ნათქვამია, რომ სამძებრო სამუშაოები შეწყდა.
„11-დღიანი ინტენსიური სამძებრო სამუშაოების შემდეგ თურქეთის სამხედრო საზღვაო ძალების ხომალდის ეკიპაჟმა შავ ზღვაში წვრთნის დროს დაკარგული სამხედრო მოსამსახურეების ძებნის ოპერაციის შეჩერების გადაწყვეტილება მიიღო.“
ძებნის ოპერაციაში, თურქული მხარის პარალელურად, თავდაპირველად, ჩართული იყო ამერიკული ავიაციაც, თუმცა, ეს ოპერაციაც უშედეგოდ დასრულდა.
16 აგვისტოს გონიოს ყოფილი სასროლეთის ტერიტორიაზე, შავ ზღვაში მიმდინარე წვრთნის დროს, ორი სამხედრო მოსამსახურე - კაპრალი იაგო შარაძე და I კლასის რიგითი გიორგი ნანეტაშვილი დაიკარგნენ. მომხდარზე მიმდინარეობს გამოძიება.
„გამოძიებას მთავარი პროკურატურა აწარმოებს. საქართველოს თავდაცვის სამინისტრო დაკარგულების ოჯახებს კანონმდებლობით გათვალისწინებულ ყველა სახის დახმარებას გაუწევს", - ნათქვამია სამინისტროს განცხადებაში.