გონიოში ინსტრუქტორებს წვრთნების ჩატარების უფლებამოსილება არ ჰქონდათ, - ამის შესახებ თავდაცვის მინისტრმა ლევან იზორიამ TV პირველთან საუბარში განაცხადა.

„ეს არის ე.წ. მყვინთავ მებრძოლთა კურსები, რომელიც 2011 წლიდან ტარდება. ეს იყო ბოლო კურსი, რომელიც 15 ივნისიდან დაიწყო და სრულდებოდა 26 აგვისტოს. აღმოჩნდა, რომ მთელი ამ წლების განმავლობაში არ იყო გაწერილი პროცედურები, თუ რის საფუძველზე უნდა მოხდეს წვრთნები. უცხოეთის ქვეყნებში, იქ სადაც წვრთნები უკავშირდება ჯარისკაცის სიცოცხლეს და ჯანმრთელობას, გარკვეულ საფრთხეს უქმნის მას, აუცილებელია ამ წესების არსებობა. რაც შეეხება მეორე ფაქტს, ინსტრუქტორებს, საქართველოში არ არსებობს სერტიფიცირებული ინსტრუქტორი, შესაბამისად, მათ არ ჰქონდათ უფლებამოსილება, როგორც ინსტრუქტორებს, ეს წვრთნები ჩაეტარებინათ. აქ იკვეთება დანაშაულის ნიშნები, თუ ვინ მიიღო ეს გადაწყვეტილება. აქ ჩანს სამსახურეობრივი გულგრილობის ნიშნები”, - განაცხადა ლევან იზორიამ.

მისი თქმით, გონიოში დაკარგული ჯარისკაცების საკითხზე გამოძიების შედეგები მალე გახდება ცნობილი.

ასევე, გავრცელდა თავდაცვის სამინისტროს განცხადება, რომ ინტენსიური სამძებრო სამუშაოების შემდეგ თურქეთის სამხედრო საზღვაო ძალების ხომალდის ეკიპაჟმა შავ ზღვაში წვრთნის დროს დაკარგული სამხედრო მოსამსახურეების ძებნის ოპერაციის შეჩერების გადაწყვეტილება მიიღო.

იაგო შარაძის  დედამ შიმშილობა დაიწყო. დაკარგული სამხედროების ახლობლები თავდაცვის სამინისტროს სთხოვს, რომ გაგრძელდეს ძიება, სხვა შემთხვევაში რადიკალურ ზომებს მიიღებენ.

კაპრალი იაგო შარაძე და I კლასის რიგითი გიორგი ნანეტაშვილი 16 აგვისტოს გონიოში, შავ ზღვაში მიმდინარე წვრთნის დროს დაიკარგნენ.