დღეს სამართალდამცველი უწყებების მიერ  საბრძოლო მასალისა და ცეცხლსასროლი იარაღის მარაგის აღმოჩენის შესახებ „ერთიანი ნაციონალური მოძრაობის“ წევრმა, დავით დარჩიაშვილმა „ლიბერალს“ განუცხადა, რომ მსგავსი ობიექტების შექმნა გასულ წლებში საგარეო მტრისაგან თავდაცვის ნაწილი იყო.
„2009-2011 წლებში თუკი ასეთი ობიექტები იქმნებოდა, იქმნებოდა ქვეყნის თავდაცვის გეგმის ფარგლებში. ამაზე არაერთხელ უსაუბრიათ. მე რაიმე ახალ, განსაკუთრებულ ინფორმაციას არ ვეყრდნობი ამ შემთხვევაში. თუკი ასეთი ობიექტები ეწყობოდა, ეწყობოდა იმისათვის, მტრის ჯარის შემოსვლის შემთხვევაში არსებულიყო წინააღმდეგობის კერები. ეს სრულიად ლეგიტიმური და კონსტიტუციური წყობილების დაცვის ფარგლებში განხორციელებული თუ ჩაფიქრებული გეგმაა. თავდაცვის ამ გეგმებს ხელისუფლება წლების განმავლობაში ამჟღავნებდა, რითაც სწორედაც სჩადის ანტისახელმწიფოებრივ ქმედებებს, ამჟაღავნებს აგრესორი სახელმწიფოს გასაგონად და მეორე მხრივ ასეთ ინფორმაციებს იყენებს თავისი ცილისმწამებლური ბინძური კამპანიის გასამყარებლად, რომ თითქოს ოპოზიცია მადესტაბილიზებელ გეგმებს ისახავს მიზნად“, - განაცხადა დავით დარჩიაშვილმა.
დღეს საქართველოს პრემიერ-მინისტრმა, გიორგი კვირიკაშვილმა, სამართალდამცველ უწყებებს მადლობა გადაუხადა დიდი ოდენობით ცეცხლსასროლი იარაღის, საბრძოლო მასალის, ფეთქებადი ნივთიერებებისა და ასაფეთქებელი მოწყობილობების პოვნისთვის.