ტელეკომპანია “იმედი", 24 ოქტომბერს გია ვოლკის, ვიქტორ დოლიძის, გია ცაგარეიშვილის და ზურაბ აბაშიძის შეხვედრის ვიდეო კადრებს ავრცელებს. “ქართული ოცნების” ფრაქციის თავმჯდომარე და პოლიტსაბჭოს წევრი გია ვოლსკი “თავისუფალი დემოკრატების” ყოფილ წევრებთან თანამშრომლობის შესაძლებლობაზე საუბრობს.
მისი თქმით, სახელმწიფო ინტერესებიდან გამომდინარე შესაძლოა, საუბარი იყოს პარტიასთან თანამშრომლობის გარკვეულ ფორმაზე: "შეიძლება, გარკვეული პერიოდის მანძილზე ადამიანი პოლიტიკური ოპონენტი იყოს, მაგრამ სახელმწიფოებრივად მსჯელობდეს, როდესაც იგივე, ევროსაპარლამენტო სტრუქტურებთან ჩვენი ურთიერთიბები ყალიბდებოდა და საკმაოდ წარმატებული იყო ამ მხრივ ვიქტორ დოლიძე”, - აღნიშნა გია ვოლსკიმ.
ზურაბ აბაშიძის განმარტებით კი, ოპოზიციაში ყოფნას არ აპირებს: "ხელისუფლებასთან ვითანამშრომლებ, მე არ ვითანამშრომლებ “ნაციონალურ მოძრაობასთან”, მომავალი გვიჩვენებს, სად ვიქნებით, როგორ ვიქნებით, ერთ რამეს გეტყვით პირდაპირ, რომ ვიქნები სახელმწიფოს სამსახურში, ვიყავი და ყოველთვის ვიქნები. ოპოზიციაში ყოფნას აღარ ვაპირებ. დრო გვიჩვენებს, დღეს რაიმე კონკრეტიკაზე საუბარი ნაადრევია”,- ამბობს ზურაბ აბაშიძე.
ზურაბ აბაშიძე, გია ცაგარეიშვილი და დავით ონოფრიშვილი ხვალ საგანგებო ბრიფინგს გამართავენ და, სავარაუდოდ მომავალ გეგმებზე უსაუბრებენ.