აუტიზმის მქონე ბავშვების მშობლებმა სოციალურ ქსელში აქცია დაიწყეს.  მშობლები თბილისის მერიისგან N33129 დადგენილების შეცვლას მოითხოვენ. აქციის ორგანიზატორის, არასამთავრობო ორგანიზაცია „ოჯახები დისკრიმინაციის წინააღმდეგ“ წევრი მარი კორკოტაძე ამბობს, რომ თბილისში 30-მდე აუტიზმის სპექტის დარღვევის მქონე ბავშვს თბილისის მერიამ რეაბილიტაციის პროგრამაში ჩასმაზე უარი რეგისტრაციის დროის გამო უთხრა.

მარი კორკოტაძეს მიაჩნია, რომ რეგისტრაციის დროის გამო უარის თქმა დისკრიმინაციული მიდგომაა და საკრებულოს მოუწოდებს, იანვრიდან მაინც გააუქმონ ეს ჩანაწერი, რათა დარჩენილ 30 ბავშვს სარეაბილიტაციო პროგრამაში ჩართვის შესაძლებლობა მიეცეს.

ქ. თბილისის მერია აუტიზმის სპექტრის დარღვევის მქონე ბავშვთა რეაბილიტაციის პროგრამაში ბავშვთა ჩასმისას ქ. თბილისის საკრებულოს 2015 წლის 29 დეკემბრის N33-129 დადგენილებით ხელმძღვანელობს, რომლის ერთ-ერთი წესი ამბობს, რომ პროგრამით სარგებლობენ მხოლოდ ის ბავშვები, რომლებიც 2015 წლის 1 ივლისის მდგომარეობით არიან თბილისში რეგისტრირებული. ანუ ბავშვები, რომლებიც თბილისში 2015 წლის ივლისის შემდეგ დარეგისტრირდნენ, პროგრამით ვერ სარგებლობენ.