ნინო გოგუაძის განცხადებით, „თავისუფალი დემოკრატებისთვის" მიუღებელია პარტიის უკვე ყოფილი ლიდერების მიერ „ქართული ოცნების" მხარდაჭერისკენ ამომრჩევლის მოწოდება.
„მოწოდება იმ ხელისუფლების მხარდაჭერისკენ, რომლის პრინციპულ ოპოზიციაშიც ვართ, „თავისუფალი დემოკრატებისთვის" მიუღებელია" - თქვა პარტიის ერთ-ერთმა ლიდერმა ნინო გოგუაძემ.
„ხელისუფლებას „თავისუფალი დემოკრატები" საკონსტიტუციო უმრავლესობის საფრთხეებზე ვაფრთხილებთ, რადგან ამა თუ იმ შესაძლო საფრთხეზე საზოგადოების ინფორმირება პოლიტიკოსების ამოცანაა. არც ერთ მოქალაქეს არავის მხარდაჭერისკენ არ მოვუწოდებთ, რადგან მიგვაჩნია, რომ მოქალაქეებმა არჩევანი თვითონ უნდა გააკეთონ და აიღონ არჩევნებზე პასუხისმგებლობა" - თქვა გოგუაძემ.
„თავისუფალი დემოკრატების“ ყოფილმა წევრებმა - დავით ონოფრიშვილმა, გიორგი ცაგარეიშვილმა და ზურაბ აბაშიძემ დღეს ბრიფინგი გამართეს, სადაც ამომრჩეველს მეორე ტურში „ქართული ოცნების" მხარდაჭერისკენ მოუწოდეს.
