რკინიგზაში სამუშაო ადგილზე მიღებული ტრავმის შედეგად, 63 წლის ზაურ გერლიანი საავადმყოფოში გარდაიცვალა - ამის შესახებ ინფორმაციას რკინიგზის ახალი პროფკავშირი ავრცელებს.
ზაურ გერლიანი რკინიგზაში 11 წელი ლიანდაგის მონტიორად მუშაობდა. 5 ოქტომბერს კაზრეთის სარკინიგზო ხაზზე ლიანდაგის სარემონტო სამუშაოების მიმდინარეობისას ზაურ გერლიანს მატარებელმა ფეხზე გადაუარა. მუშამ ადგილზე ბევრი სისხლი დაკარგა. კიდურის ამპუტაციისა და 15-დღიანი ჰოსპიტალიზაციის მიუხედავად, ექიმებმა მისი გადარჩენა ვერ შეძლეს.
აღნიშნული ფაქტი მიმდინარე წელს სამუშაო ადგილზე მიღებული ტრამვის შედეგად გარდაცვალების მესამე შემთხვევაა საქართველოს რკინიგზაზე.
შრომის პოლიტიკის დაუყოვნებლივ გადახედვისა და ეფექტიანი შრომის ინსპექციის შექმნის მოთხოვნით, პროფკავშირების გაერთიანება და ათზე მეტი არასამთავრობო ორგანიზაცია, ხვალ, 28 ოქტომბერს 13:00 საათზე, კანცელარიასთან გამაფრთხილებელ აქციას გამართავს! ახალი პროფკავშირი საზოგადოებას მოუწოდებს, აქციაზე მივიდნენ და ძლიერი შრომის ინსპექცია მოითხოვონ.
