„ნაციონალური მოძრაობის” გორის მაჟორიტარი დეპუტატობის კანდიდატის, ბადრი ბასიშვილის თქმით, „ქართული ოცნება“ ცრუობს, როცა ამბობენ, რომ დღეს „ერთიანი ნაციონალური მოძრაობის“ წევრები „ქართული ოცნების“ კარალეთის შტაბში შეიჭრნენ და სიტყვიერი და ფიზიკური შეურაცხყოფა მიაყენეს შტაბის თანამშრომლებს.
„ქართული ოცნება“ ცრუობს. ჩვენი შტაბის წარმომადგენლები დადიოდნენ დევნილთა დასახლებაში მეორე ტურთან დაკავშირებით. ამ დროს „ქართული ოცნების“ შტაბში შენიშნეს საჯარო მოხელეები - გამგებლის მოადგილე, სამსახურის უფროსები. ჩვენი შტაბის ერთ-ერთმა წევრმა მიუთითა, რომ ეს იყო კანონდარღვევა, ვინაიდან საჯარო მოხელეებს სამუშაო საათებში არ ჰქონდათ შტაბში ყოფნის უფლება. ამან მათი გაღიზიანება გამოიწვია და ჩვენი ორგანიზაციის აღმასრულებელ მდივანს, კახა ლობჟანიძეს სიტყვიერი შეურაცხყოფა მიაყენეს. ამის ამსახველი ფოტო/ვიდეო მასალა არსებობს და უახლოეს ხანში გავავრცელებთ“ - განუცხადა „ლიბერალს“ ბადრი ბასიშვილმა.
ცოტა ხნის წინ „ქართულმა ოცნებამ“ განცხადება გაავრცელა, სადაც ნათქვამია, რომ „ნაციონალური მოძრაობის“ წევრები შეიჭრნენ „ქართული ოცნების" კარალეთის შტაბში და სიტყვიერი და ფიზიკური შეურაცხყოფა მიაყენეს შტაბის თანამშრომლებს.