დღეს მთავრობის სხოდმაზე განასხილველი პროექტების ჩამონათვალში მოხვდა „საქართველოს საპატრიარქოს წმინდა კეთილმსახური მეფე თამარის სახელობის სკოლა-პანსიონისათვის ფინანსური დახმარების გაწევის“ საკითხი. კერძოდ პროექტის მიხედვით, საქართველოს განათლების სამინისტროს დაევალა ფინანსური დახმარება გაუწიოს სკოლა-პანსიონს.
განათლების მინისტრის თქმით, განათლების სამინისტრო საპატრიარქოს მართვაში არსებულ სკოლა-პანსიონს 280 000 ლარით დაეხმარება.
„ჩვენ ვაპირებთ, რომ მომავალ წლებში შევიმუშაოთ ზოგადად პანსიონების ქსელის განვითარების ერთიანი სისტემა. თქვენ გეცოდინებათ, რომ წინა წლებში საქართველოში ძალიან ბევრი პანსიონი მუშაობდა ბევრ რეგიონშიც და თბილისშიც. წლების განმავლობაში ეს პანსიონები განადგურდა. ბევრი ახალგაზრდაა, ზოგი განსაკუთრებული ნიჭით დაჯილდოებული, ზოგი სპეციალური საჭიროების მქონე, ზოგიც სოციალურად დაუცველი ოჯახებიდან, ვისთვისაც დიდი სიკეთე იქნებოდა პანსიონური მომსახურება და ასეთი სწავლება.
ცალკეული ნათელი წერტილები გვაქვს და ეს სკოლა არის ერთ-ერთი ასეთი ნათელი წერტილი. ფაქტობრივად, სოციალურად დაუცველი ოჯახების შვილებს შეიკედლებენ, სადღაც 100-მდე მოსწავლეს. მათ შეექმნათ მატერიალური სირთულე სხვადასხვა პირობის გამო, ერთჯერადი დახმარებისთვის მოგვმართეს და იმედია, უფრო ფართო პროგრამა გვექნება საერთოდ, საპანსიონო... ამის საჭიროებას ვხედავთ და გვინდა, რომ ხელი შევუწყოთ გრძელვადიან პერსპექტივას.“ - განაცხადა ალექსანდრე ჯეჯელავამ მთავრობის სხდომის დასრულების შემდეგ.
