საპარლამენტო უმცირესობა „გაზპრომთან" შეთანხმების საკითხზე პარლამენტში პოლიტიკური დებატების გამართვას მოითხოვს.
ფრაქცია „ევროპული საქართველოს" თავმჯდომარის, სერგო რატიანის თქმით, ენერგეტიკის მინისტრმა უმცირესობის ფრაქციებთან შეხვედრაზე უარის თქმით კანონი დაარღვია, ახლა კი უმრავლესობას მოუწევს პასუხის გაცემა შეკითხვაზე, „რატომ ჩაიდინა ხელისუფლებამ ანტისახელმწიფოებრივი ქმედება".
„სახელმწიფოსთვის უმნიშვნელოვანესია „გაზპრომის" თემა. მოვითხოვთ პარლამენტში პოლიტიკურ დებატებს. უმრავლესობას მოუწევს პასუხის გაცემა შეკითხვაზე, რატომ დააზიანა ქვეყნის ენერგოუსაფრთხოება და რატომ მიაყენა ეკონომიკური ზიანი ქვეყანას. ამ ყველაფერზე უნდა გაიმართოს პოლიტიკური დებატები" - თქვა რატიანმა.
„გაზპრომის" საკითხის პარლამენტში განხილვის საჭიროებას ხედავს პარლამენტის თავმჯდომარის მოადგილე, ფრაქცია „საქართველოს პატრიოტების" წევრი ირმა ინაშვილიც.
მისი თქმით, ენერგეტიკის მინისტრმა, კახა კალაძემ „გაზპრომთან" ხელშეკრულების დეტალებზე პარლამენტში საფუძვლიანი არგუმენტები უნდა წარმოადგინოს. ინაშვილი შეთანხმებაში გარეგნულად „საფრთხისშემცველ პროცესს" ხედავს.
