არასამთავრობო ორგანიზაცია „ადამიანის უფლებათა ცენტრის“ იურიდიული სამსახურის უფროსმა, თამარ ავალიანმა საქალაქო სასამართლოში, „რუსთავი 2”-ის გენერალური დირექტორის, ნიკა გვარამიას გამოკითხვის დასრულების შემდეგ განაცხადა, რომ კითხვები, რომლებიც გამოკითხვაზე დაისვა არც ფაქტობრივად და არც სამართლებრივად არ უკავშირდებოდა დაწყებულ გამოძიებას.
„კითხვები, რომელიც დაისვა არც ფაქტობრივად და არც სამართლებრივად არ უკავშირდება დაწყებულ გამოძიებას. შინაარსთან დაკავშირებით დასმული კითხვები ლეგიტიმურ ეჭვს ბადებს, რომ შესაძლოა საგამოძიებო ორგანოები და დაინტერესებული პირები ამ ყველაფრიდან ქრთამის აღების ფაქტის გამოდნობას ცდილობენ. ჩანაწერის შინაარსობრივი გარემოებები არ არის გამოძიების საგანი“.- განაცხადა თამარ ავალიანმა.
საქმე ეხება ტელეკომპანიის დირექტორსა და თბილისის საქალაქო სასამართლოს ყოფილ თავმჯდომარეს შორის საუბრის ფარულ ჩანაწერს. მისი გავრცელების შემდეგ ნიკა გვარამიამ დაადასტურა, რომ მათ ნამდვილად ისაუბრეს და ეს თავად ჩაიწერა. თუმცა განაცხადა, რომ მათი საუბარი სხვა საკითხებს შეეხებოდა და გავრცელებული ჩანაწერი დამონტაჟებული იყო. გუშინ კი შსს-მ გაავრცელა ინფორმაცია, რომ ექსპერტიზის დასკვნით, ეს ჩანაწერი დაუმონტაჟებელია. გავრცელებული აუდიოჩანაწერის მიხედვით, ნიკა გვარამია მამუკა ახვლედიანს სკანდალურად გადადგომის სანაცვლოდ 6 მილიონს სთავაზობს. ამ ჩანაწერზე შსს-მ გამოძიება კომპიუტერულ სისტემაში უნებართვო შეღწევის მუხლით დაიწყო.
