„რეაგირების მოლოდინი არანაირად არ გვქონია. განცხადება იმისთვის არ გაკეთებულა, რომ ამას მისცემოდა სამართლებრივი შეფასება“, - ასე აფასებს საზოგადოებრივი მაუწყებლის გენერალური დირექტორის მრჩეველი ია ანთაძე შსს-ს მიერ „აუდიტორია 115-ის“ საზმაუში შეჭრის გამო გამოძიების სს კოდექსით დაწყებას.

ანთაძე „ლიბერალთან“ ამბობს, რომ აღმასრულებელი საბჭო, შესაბამისი სურვილის შემთხვევაში, ამას განცხადებაში თავადვე მიუთითებდა.

 „არ ვარ საქმის კურსში. ჩვენ მაშინ ნამდვილად არ მოგვითხოვია ამ საქმესთან დაკავშირებით რაიმე გაგრძელება და სამართალდამცავების მხრიდან რეაგირება. ამიტომ, ამ წუთას თქვენი ინფორმაცია ჩემთვის მოულოდნელია... არავითარი მოლოდინი არ გვქონია ამ საკითხთან დაკავშირებით. ჩვენ რომ გვდომოდა, რომ ამას ჰქონოდა სხვა კვალიფიკაცია და შესაბამისი უწყებები ჩართულიყვნენ, მოვითხოვდით ამას პირდაპირ ჩვენს განცხადებაში“, - უთხრა ანთაძემ „ლიბერალს“.

მისივე განმარტებით, განცხადება იმისთვის არ გაუვრცელებიათ, რომ საკითხს სამართლებრივი შეფასება მისცემოდა.

როგორც შინაგან საქმეთა სამინისტროში ლიბერალს უთხრეს, „აუდიტორია 115-ის“ წევრების მიმართ გამოძიება სისხლის სამართლის კოდექსის 239-ე მუხლით მიმდინარეობს, რაც ხულიგნობას გულისხმობს.

9 თებერვალს „საზოგადოებრივი მაუწყებლის“ აღმასრულებელი საბჭო აქციის მონაწილეების მაუწყებლის ფოიეში შეჭრის ფაქტს გამოეხმაურა და მას „ჟურნალისტურ საქმიანობაში ხელის შეშლა და საზოგადოებრივი მაუწყებლის საქმიანობის უხეში ხელყოფა" უწოდა.

მათ თქმით, „ძალადობრივ ქმედებაზე პასუხისმგებლობა ეკისრებათ აქციის ორგანიზატორებს და მონაწილეებს". 

საზმაუს საბჭო: შენობაში შეჭრა იყო ჟურნალისტურ საქმიანობაში ხელის შეშლა