პრეზიდენტის პრესსპიკერი, „საზოგადოებრივი მაუწყებლის“ ყოფილი ჟურნალისტი „ლიბერალთან“ საუბრისას ამბობს, რომ კმაყოფილია სასამართლოს გადაწყვეტილებით.
„რაც მთავარია, დადგინდა, რომ ჩემი გათავისუფლება იყო უკანონო" - ამბობს მიშველაძე.
ეკა მიშველაძის ადვოკატის, ნონა ქურდოვანიძის თქმით, სასამართლომ არ დააკმაყოფილა მათი მოთხოვნა, დისკრიმინაციული მოტივით გათავისუფლების ნაწილში. მისი აზრით მთავარი ისაა, რომ სასამართლოს აზრით, მიშველაძის გათავისუფლებით შრომის კოდექსის მოთხოვნები დაირღვა.
როგორც ადვოკატი ამბობს, დასაბუთების ჩაბარების შემდეგ გადაწყვეტენ, რამდენად მიზანშეწონილია იმ მუხლების გასაჩივრება სააპელაციო სასამართლოში, რომელიც საქალაქომ არ დააკმაყოფილა.
რამდენიმე წუთის წინ, თბილისის საქალაქო სასამართლომ ჟურნალიტ ეკა მიშველაძის სარჩელი ნაწილობრივ დააკმაყოფილა. მოსამართლის ასმათ კოხრეიძის გადაწყვეტილებით, ბათილად არის ცნობილი მაუწყებლის ყოფილი დირექტორის გიორგი ბარათაშვილის 11 თებერვლის ბრძანება შრომითი ხელშეკრულების შეწყვეტის შესახებ, „საზოგადოებრივ მაუწყებელს“ დაეკისრა ეკა მიშველაძისთვის 30 ათასი ლარის, ხოლო ბიუჯეტის სასარგებლოდ - სახელმწიფო ბაჟის 900 ლარის გადახდა.