„აუდიტორია 115-ის" წევრი გიორგი სოფრომაძე პოლიციის სამმართველოში დაკითხვაზე მივიდა. 

სოფრომაძე ამბობს, რომ ხულიგნობაში დადანაშაულებით „აუდიტორია 115-ის“ საქმიანობას ვერ შეაჩერებენ. 

„როგორ ჩანს, ხულიგნობად არის შეფასებული ის აქტი, როცა „აუდიტორია 115“ საშვის გარეშე შევიდა საზოგადოების კუთვნილ საჯარო სივრცეში და გამოხატა პოზიცია, აღნიშნა ის პრობლემები, რომლებიც ყოველდღიურად აწუხებს თითოეულ ადამიანს ამ ქვეყანაში. თითოეულ დასაქმებულს, მასწავლებელს, მუშას, მემანქანეს ყოველდღიურობაში.

ეს პრობლემები არის ჩვენი ყოველდღიურობა და ამაზე „აუდიტორია 115-მა“ გააკეთა განცხადება, წაიკითხა მანიფესტი და როგორც ჩანს, ეს აღმოჩნდა ხულიგნობა. ეს აღმოჩნდა ჩვენთვის ხულიგნობის ბრალდების წაყენების წინაპირობა, რაც არის სრულიად აბსურდული, მიზანმიმართული ქმედება იმ ქმედებათა შორის, რომელთაც აწარმოებენ ელიტები ეკონონომიკური თუ პოლიტიკური, „აუდიტორია 115-ის“ წინააღმდეგ.

ვინც არ უნდა სცადოს ჩვენი დაკითხვა, ბრალის წაყენება, ხულიგნობაში დადანაშაულება, თუ რაც უნდა გვიწოდონ, ეს ჩვენთვის ვერ იქნება ბარიერი იმისთვის, რომ გავაგრძელოთ გზა რომელიც ავირჩიეთ გაბატონებული წესრიგის წინააღმდეგ" - თქვა სოფრომაძემ. 

როგორც შინაგან საქმეთა სამინისტროში „ლიბერალს“ უთხრეს, „აუდიტორია 115-ის“ წევრების მიმართ გამოძიება სისხლის სამართლის კოდექსის 239-ე მუხლით მიმდინარეობს, რაც ხულიგნობას გულისხმობს.

საქმე ეხება საზოგადოებრივი მაუწყებლის წინ გამართულ აქციას, რა დროსაც, საპროტესტო აქციის მონაწილეებმა, დაცვის წინააღმდეგობის მიუხედავად, შენობაში შესვლა მოახერხეს, და მოთხოვნის შედეგად, პირდაპირ ეთერში ჩაერთვნენ.