„რუსთავი 2-ის“ წილის 91% -ის მფლობელები, ძმები ლევან და გია ყარამანიშვილები ფეისბუკით მორიგ განცხადებას ავრცელებენ. ისინი უკმაყოფილებას გამოთქვამენ, რომ „რუსთავი 2-მა“ მათი გუშინდელი განცხადება არასათანადოდ გააშუქა. ყარამანიშვილების განცხადებით, ხვალიდან დაიწყებენ კოლექტივთან პირდაპირ კონსულტაციებს.
„სამწუხაროა, რომ ჩვენი გუშინდელი განცხადება, რომელიც 15:25-ზე გავრცელდა, პრაქტიკულად არ გაშუქებულა (მშრალად გავიდა 6 საათიანი კურიერის შუაში, თემის გაუშლელად, და საერთოდ არ გაშუქებულა 9 საათიან კურიერში). ეს იმ ფონზე, როცა გენერალური დირექტორის მიერ მოწვეულ თათბირს ამხელა დრო დაეთმო ეთერში.
ჩვენი განცხადება რომ გაშუქებულიყო, საზოგადოება და ჩვენი კოლექტივი ბევრ უხერხულობას აცდებოდა (პირველ რიგში, ზემოხსენებული თათბირის კონტექსტში). ამიტომ, ხელახლა, უცვლელად ვავრცელებთ ჩვენს გუშინდელ განცხადებას (სადაც ხაზს ვუსვამთ, რომ არანარი შუამავალი შპს-ს მონაწილეობა არ განიხილება) და ხვალიდან გადავდივართ კოლექტივთან პირდაპირი კონსულტაციების რეჟიმში“, - წერია ლევან ყარამანიშვილის ფეისბუკ გვერდზე გამოქვეყნებულ განცხადებაში
გუშინ ყარამანიშვილებმა „რუსთავი 2-ის“ თანამშრომელთა შეთავაზებაზე საპასუხო განცხადება გაავრცელეს და მზადყოფნა გამოთქვეს, რომ ტელეკომპანია „საქართველოს“ აქციების საკონტროლო პაკეტი „რუსთავი 2-ის“ თანამშრომლებს გადასცენ („საქართველო“ ტელეკომპანიის 51%-იანი წილის მფლობელია).