ე.წ. ციანიდის საქმეზე ბრალდებულმა დეკანოზმა, გიორგი მამალაძემ სასამართლო პროცესზე განაცხადა, რომ სურს, პროცესი ღია და საჯარო იყოს.
თბილისის საქალაქო სასამართლოში დეკანოზ გიორგი მამალაძისთვის აღკვეთის ღონისძიების საქმეზე მსჯელობენ. პროკურატურამ სასამართლოს პროცესის დახურვის შუამდგომლობით მიმართა, ვინაიდან ბრალდების მხარის მტკიცებით, დღევანდელ სხდომაზე საიდუმლო მასალები უნდა ყოფილიყო წარდგენილი, შედეგად თბილისის საქალაქო სასამართლომ მამალაძისთვის აღკვეთის ღონისძიების მიზანშეწონილობის საკითხზე პროცესი ნაწილობრივ დახურა.
მამალაძის ადვოკატებმა სასამართლოს აღკვეთის ღონისძიების შეცვლის შუამდგომლობით მიმართეს და მოითხოვეს, რომ დეკანოზი წინასწარი პატიმრობიდან გაათავისუფლონ და მის მიმართ უფრო მსუბუქი აღკვეთის ღონისძიება - გირაო გამოიყენონ. პროკურატურა კი დეკანოზის პატიმრობაში დატოვებას მოითხოვს.