მოძრაობა „თავისუფლებისთვის - ევროპული საქართველოს" წევრის, დეპუტატ ოთარ კახიძის თქმით, კლუბური ნარკოტიკის მოხმარებაზე სასჯელის სახით თავისუფლების აღკვეთა არ უნდა ვრცელდებოდეს.

მისი თქმით, ის მიესალმება პარლამენტში ინიცირებულ კანონპროექტს, რის მიხედვითაც მარიხუანის მოხმარებისთვის თავისუფლების აღკვეთის გამოყენება უქმდება. ამასთან, კახიძე მიიჩნევს, რომ ანალოგიური მიდგომა - თავისუფლების აღკვეთის, როგორც სასჯელის აკრძალვა უნდა გავრცელდეს აგრეთვე კლუბურ ნარკოტიკებზე და მათ მოხმარებაზე.

„ჩვენ გვაქვს არაორდინალური სიტუაცია. პრაქტიკულად, დრაკონური სისხლისამართლის კანონმდებლობა, რომელიც ითვალისწინებს, მაგალითად გაუპატიურებისთვის 6-დან 8 წლამდე თავისუფლების აღკვეთას, ყაჩაღობისთვის 5-დან 7 წლამდე თავისუფლების აღკვეთას, ამბოხება და შეთქმულება კონსტიტუციური წყობილების შესაცვლელად 5-დან 8 წლამდე თავისუფლების აღკვეთას და ამ პირობებში, კლუბური ნარკოტიკის ქონისთვის ახალგაზრდებს 8 წლით თავისუფლების აღკვეთას უსჯიან. ეს მიდგომა არის გადასახედი", - ამბობს კახიძე.

მისი თქმით, „ევროპულ საქართველოს" პარლამენტში შეაქვს ინიციატივა, რომ ნარკოტიკების მოხმარებელთა მიმართ პოლიტიკა ფუნდამენტალურად შეიცვალოს.

„აქ არ იგულისხმება რა თქმა უნდა გასაღების მიზანი. ჩვენთვის მნიშვნელოვანია დაცული იყოს საზოგადოებრივი წესრიგი, მაგრამ ეს უნდა მოხდეს იმგვარად, რომ რაც შეიძლება ნაკლები ადამიანი წავიდეს ციხეში და პატიმრობა, როგორც თავისუფლების აღკვეთა არ იყოს გამოყენებული სასჯელად", - აღნიშნა ოთარ კახიძემ.