იუსტიციის სამინისტროს ინფორმაციით, სტრასბურგის მოსამართლეობის მსურველთა განაცხადების მიღება 14 აპრილს დასრულდება, ხოლო ხუთი კანდიდატურა მთავრობას პირველ ივლისამდე წარედგინება
უწყებაში განმარტავენ, რომ სტრასბურგის მოსამართლის კანდიდატთა საგამოცდო ვადამ მხოლოდ ერთხელ გადაიწია და ეს ცვლილება აისახა მთავრობის დადგენილებაში.
"ადამიანის უფლებათა ევროპულ სასამართლოში საქართველოდან ასარჩევი მოსამართლის კანდიდატურებისათვის საბუთების წარდგენის ვადამ 14 მარტს გადაიწია მხოლოდ ერთხელ, ერთი თვით, და ნაცვლად 14 მარტისა, განისაზღვრა 14 აპრილით; ხოლო მთავრობისათვის კანდიდატურების წარდგენის ვადა, შესაბამისად, ნაცვლად პირველი აპრილისა, პირველ ივლისამდე გახანგრძლივდა. სწორედ 14 აპრილიდან პირველ ივლისამდე უნდა მოხდეს საბუთების გადარჩევა და გამოცდების ჩატარებაც.
ცვლილება ვადაში იმით არის გამოწვეული, რომ, ევროპის საბჭოს საპარლამენტო ასამბლეის (PACE) გადაწყვეტილებით, სტრასბურგის სასამართლოში საქართველოს წარმომადგენელ მოსამართლეს საპარლამენტო ასამბლეა საშემოდგომო სესიაზე აირჩევს. შესაბამისად, „PACE“-ს მიერ საქართველოს მთავრობისთვის მოწოდებული ინფორმაციის თანახმად, საქართველოდან კანდიდატურები ევროპის საბჭოს საპარლამენტო ასამბლეას 31 აგვისტომდე უნდა წარედგინოს.
ამდენად, ორჯერ ვადის გადაწევას ადგილი არ ჰქონია. 27 მარტს გამოქვეყნდა დადგენილება, თუ რა ვადაში უნდა წარუდგინოს საკონკურსო კომისიამ საქართველოს მთავრობას ხუთი კანდიდატურა, რომელთაგან მთავრობა შეარჩევს სამს. ყველა სხვა განცხადება ვადის ორჯერ გახანგრძლივების შესახებ მცდარია და არ შეესაბამება სინამდვილეს, "- ნათქვამია იუსტიციის სამინისტროს მიერ გავრცელებულ განცხადებაში.
საქართველოდან წარდგენილი მოსამართლეობის სამი კანდიდატიდან ერთ-ერთი სტრასბურგის ადამიანის უფლებათა ევროპულ სასამართლოში 2017 წლის იანვარში უნდა აერჩიათ, თუმცა კანდიდატთა სია ჩავარდა. წარდგენილი კანდიდატები იყვნენ იუსტიციის უმაღლესი საბჭოს წევრი ევა გოცირიძე, საქართველოს იუსტიციის მინისტრის მოადგილე ალექსანდე ბარამიძე და ადამიანის უფლებათა ევროპული სასამართლოს იურისტი გიორგი ბადაშვილი.