სირიაში მომხდარ ქიმიურ თავდასხმაში რუსეთის თავდაცვის სამინისტრო აჯანყებულებს ადანაშაულებს.
ქიმიური თავდასხმის შედეგად, სირიაში ბოლო მონაცემებით, 70-ზე მეტი ადამიანი დაიღუპა. მათ შორის ათეულობით ბავშვია. ქიმიური თავდასხმა იდლიბის ჩრდილოეთ პროვინციაში მოხდა, რაშიც სირიის მთავრობას ადანაშაულებენ.
სირიის ადამიანის უფლებათა ობსერვატორიის ინფორმაციით, ავიაიერიშში სირიის სამხედრო თვითმფრინავები მონაწილეობდა, რის შემდეგაც ადამიანებს ქიმიური მოწამვლის სიმპტომები აღენიშნებოდათ. მათი თქმით, დაღუპული ბავშვების ასაკი, ძირითადად, 8 წლის ქვემოთაა. აღნიშნულის შესახებ ინფორმაციას პროვინციაში მყოფი მონიტორინგის ჯგუფები, მედიცინის მუშაკები და მაშველებიც ადასტურებენ.
სირიის მთავრობის წარმომადგენლები და სამხედრო პირები კატეგორიულად უარყოფენ სირიის არმიის მიერ ქიმიური იარაღის გამოყენებას.
