საქართველოს მთავრობის დადგენილებით, ყვარელში მდებარე კულტურული მემკვიდრეობის უძრავ ძეგლს − დოლოჭოპის სამნავიან ბაზილიკას ეროვნული მნიშვნელობის კატეგორია განესაზღვრა.
ძეგლს ეროვნული მნიშვნელობის კატეგორია შეიძლება განესაზღვროს, თუ მას აქვს გამორჩეული მხატვრული ან ესთეტიკური ღირებულება ან დაკავშირებულია უმნიშვნელოვანეს ისტორიულ მოვლენასთან, პიროვნებასთან, ერის განვითარების ეტაპსა თუ გამორჩეულ ზოგად ეროვნულ ღირებულებებთან.
დოლოჭოპის სამნავიანი ბაზილიკის ნანგრევები მდინარე დურუჯის მარჯვენა ნაპირზე მდებარეობს.
ტაძარი აგებულია კახეთის არქიტექტურისათვის დამახასიათებელი ტრადიციული სამშენებლო მასალით.
ბაზილიკა ხუთი წყვილი ჯვრისებრი გეგმის სვეტით სამ ნავად არის გაყოფილი. გეგმის დონეზე იკითხება სხვადასხვა პერიოდის ჩაშენებები. ტაძრის ინტერიერში უსისტემოდ განთავსებულია ქვა-ყუთი სამარხები.