გარემოსდაცვითი ზედამხედველობის დეპარტამენტის ინფორმაციით, ქვემო ქართლის რეგიონული სამმართველოს გარემოსდაცვითი ინსპექტირების განყოფილების თანამშრომლებმა ნარჩენების მართვის კოდექსის წესების დარღვევის 12 ფაქტი გამოავლინეს.

„მოქალაქეებმა გარდაბნისა და მარნეულის მუნიციპალიტეტების სოფლების - აღთაკლია, საიმერლო, კასუმლო, იმირისა და პირველ ქესალოს მიმდებარედ დაყარეს 2კგ-მდე მუნიციპალური ნარჩენი. შედგა საჯარიმო ქვითრები-ადმინისტრაციული სამართალდარღვევის ოქმები. სამართალდამრღვევებს ჯარიმა განესაზღვრათ 80-80 ლარის ოდენობით.

ასევე, ზოგიერთმა მოქალაქემ გარდაბნისა და მარნეულის მუნიციპალიტეტის სოფელ ნაზარლოსა და შულავერის მიმდებარედ, დაყარეს 20 კგ-მდე ცხოველის სხეულის ნარჩენი. მათ მიმართ შედგა საჯარიმო ქვითრები-ადმინისტრაციული სამართალდარღვევის ოქმები. სამართალდამრღვევებს ჯარიმა განესაზღვრათ 150-150 ლარის ოდენობით", - აცხადებენ გარემოსდაცვითი ზედამხედველობის დეპარტამენტში.