„გირჩის“ მიერ დაფუძნებული რელიგიური ორგანიზაცია - საქართველოს ქრისტიანული, ევანგელისტური, პროტესტანტული ეკლესია ბიბლიური თავისუფლება, მღვდელმსახურის ცნობას გასცემს, რაც წვევამდელებს სამხედრო სამსახურის გადავადებაში ეხმარება.
როგორც „გირჩის“ ერთ-ერთმა დამფუძნებელმა, იაგო ხვიჩიამ „ლიბერალს“ უთხრა, ორგანიზაცია დაახლოებით ერთი თვის წინ დააფუძნეს იუსტიციის სამინისტროში. შესაბამისად, ორგანიზაცია სახელმწიფოს მიერაა აღიარებული და მას სამართლებრივი საფუძველი აქვს, რათა მღვდელმსახურის ცნობა გასცეს. კანონის თანახმად კი, წვევამდელს სამხედრო სამსახურში გაწვევა გადაუვადდება, თუკი ის მღვდელმსახურია ან სწავლობს სასულიერო სასწავლებელში. მისივე თქმით, ამ გზით წვევამდელის სამხედრო სავალდებულო სამსახურში გაწვევის გადავადება რეალურია, ვინაიდან, უკვე რამდენიმე ადამიანმა გაწვევა სწორედ აღნიშნული ცნობის საფუძველზე გადაავადა.
„ქართული კანონმდებლობით რელიგიური ორგანიზაცის მღვდელმსახური თავისუფლდება სამხედრო სავალდებულო სამსახურისგან. ამიტომ, თუ ადამიანს მაინც წაიყვენენ ჯარში, ეს იქნება კანონის აშკარა და უხეში დარღვევა, რაც თავისთავად არის საფუძველი სასამართლოში გასაჩივრების“,- ამბობს იაგო ხვიჩია.
მისივე თქმით, ყველა ვერ გახდება აღნიშნული რელიგიური ორგანიზაციის მღვდელმსახური, მნიშვნელოვანია, რომ მას სჯეროდეს თავისუფლების იდეალების, - „არ უნდა იყოს ფაშისტი, ჰომოფობი ან ქსენოფობი. ამ ადამიანს აქვს მოვალეობა, რომ თავისუფლების იდეის რწმენა გაავრცელოს საზოგადოებაში“,- ამბობს იაგო ხვიჩია.
იაგო ხვიჩია ამბობს, რომ თავდაპირველად რელიგიური ორგანიზაციის დაფუძნებაზე იუსტიციის სამინისტრომ რამდენჯერმე უარი უთხრათ:
„თავდაპირველად გვინდოდა, რომ სხვა რელიგიური ორგანიზაცია დაგვეფუძნებინა, იუსტიციის სამინისტრომ რამდენჯერმე გვითხრა უარი, ბოლოს დავაფუძნეთ საქართველოს ქრისტიანული, ევანგელისტური, პროტესტანტული ეკლესია ბიბლიური თავისუფლება, რაზეც უარი ვერ გვითხრეს, რადგან ქრისტიანულ კონფესიას მიეკუთვნება. თავიდან გავინდოდა რაიმე ნეიტრალური ტიპის ორგანიზაციის დაფუძნება, რომელიც მსოფლიოში არის ცნობილი, ასევე გვინდოდა, მაგალითად, არმაზის კერპის დაფუძნება და გვითხრეს უარი იმ მოტივით, რომ ეს საქართველოსთვის არ არის ტრადიციული, მიუხედავად იმისა, რომ ჩვენ ისტორიული წყაროები გვქონდა თან დართული, რომ არმაზის კერპი საქართველოშიც არის ტრადიციული რელიგია“,- ამბობს იაგო ხვიჩია.
