2016 წლის მარტში პირადი და ოჯახური ცხოვრების ამსახველი ვიდეოჩანაწერების შენახვისა და გავრცელების ფაქტზე საქართველოს სისხლის სამართლის კოდექსის 157-ე მუხლით ბრალი 5 პირს წარედგია. ამას გარდა, 11 და 14 მარტს ინტერნეტსივრცეში გავრცელებულ პირადი ცხოვრების ამსახველ ვიდეოჩანაწერის უკანონოდ მოპოვებისა და შენახვის ფაქტთან დაკავშირებით პროკურატურამ სსკ-ის 333-ე მუხლით ბრალი 8 პირს წარუდგინა,- ამის შესახებ ადამიანის უფლებების დაცვის სამოქმედო გეგმის შესრულებს შუალედურ ანგარიშშია ნათქვამი.
რაც შეეხება გამოძიებას, შსს-ს ინფორმაციით, 2016 წელს 157-ე მუხლით გამოძიება 21 საქმეზე დაიწყო, საიდანაც 4 მათგანზე სისხლისსამართლებრივი დევნა გამოცხადდა. ხოლო 17 საქმეზე გამოძიება მიმდინარეობს. ამასთან, სსკ-ის 1571 მუხლით გამოძიება 3 საქმეზე დაიწყო და ამ დრომდე მიმდინარეობს.
როგორც შუალედურ ანგარიშში ვკითხულობთ, საანგარიშო პერიოდში პერსონალურ მონაცემთა დაცვის ინსპექტორის აპარატმა შეისწავლა მონაცემთა დამუშავება 91 საჯარო და 239 კერძო ორგანიზაციაში. შედეგად 121 ორგანიზაციაში სამართალდარღვევის 195 ფაქტი გამოვლინდა. მათგან ჯარიმა 60 სუბიექტს დაეკისრა, ხოლო ხანდაზმულობის გამო პასუხისმგებლობა 28 სუბიექტს ვერ დაეკისრება.
ანგარიშში რეკომენდაციებზეცაა საუბარი და აღნიშნულია, რომ პირადი ცხოვრების ხელშეუხებლობის უფლების დაცვის მიზნით პერსონალუ მონაცემთა დაცვის ინსპექტორის აპარატმა მონაცემთა დაცვასთან დაკავშირებით სახელმძღვანელო უნდა შეიმუშაოს. ხოლო პროკურატურამ პირადი ცხოვრების ხელყოფის ფაქტებზე ეფექტიანი სისხლის სამართალწარმოების უზრუნველყოფის მიზნით შესაბამისი ნაბიჯები გადადგას.
