20 მაისს „სტუდია მონიტორის“ ჟურნალისტური გამოძიება ტელეკომპანია „კავკასიის“ ეთერში გასვლამდე განადგურდა. ამის შესახებ „სტუდია მონიტორმა“ Facebook გვერდზე გუშინ დაწერა. ჟურნალისტური გამოძიება ცხვრის ბიზნესს ეხებოდა.
„შაბათს, 20 მაისს ტელეკომპანია „კავკასიის“ ეთერში უნდა გასულიყო „სტუდია მონიტორის“ ჟურნალისტური გამოძიება ცხვრის ბიზნესის შესახებ. ანონსის გავრცელების შემდეგ, გადაცემის ეთერში გასვლის წინა დღეს, 19 მაისს, სამწუხაროდ, გაურკვეველი მიზეზის გამო, დამონტაჟებული გადაცემა განადგურდა. სპეციალისტის შეფასებით, მყარი დისკის დაზიანება, სავარაუდოდ, ქსელში გაშვებულმა ვირუსმა გამოიწვია, რის გამოც ჟურნალისტური გამოძიება ეთერში ვერ გავიდა. „სტუდია მონიტორი“ განაგრძობს ამ გადაცემაზე მუშაობას და იმედი გვაქვს, უახლოეს მომავალში შემოგთავაზებთ“, - წერია „სტუდია მონიტორის“ განცხადებაში
როგორც „ლიბერალს“ „სტუდია მონიტორის“ ხელმძღვანელმა, ნინო ზურიაშვილმა განუცხადა, აღნიშნულ ფაქტზე შსს-სთვის არ მიუმართავთ.
„არ მივმართეთ პოლიციას, რადგან აზრს ვერ ვხედავთ“, - ამბობს ზურიაშვილი.
ნინო ზურიაშვილის თქმით, გადაცემას რამდენიმე დღეში აღადგენენ.