საქართველოს პრეზიდენტის აზრით, ის, რაც ახლა ხდება თვითმმართველობასა და თვითმმართველ ქალაქებთან მიმართებაში, არის ევროპული მმართველობის საწინააღმდეგო ტენდენცია და აფერხებს სახელმწიფოს პროპორციულ განვითარებას, - განაცხადა საქართველოს პრეზიდენტის პრესსპიკერმა დღეს გამართულ ბრიფინგზე.
„პირველ რიგში შეგახსენებთ თვითმმართველობის შესახებ ევროპულ ქარტიას. საქართველოს პარლამენტში ქარტიის რატიფიცირება მოხდინა 2004 წელს. ქარტიის მთავარი პრინციპია თვითმმართველობის განვითარება, გაღრმავება და არა შესუსტება და შეზღუდვა. ევროპაში, რომლის ნაწილიც არის საქართველო და საითკენაც მივისწრაფით ჩვენ, თვითმმართველობა არის დემოკრატიული სახელმწიფოს ერთ-ერთი ძირითადი საფუძველი. პრეზიდენტის აზრით, ის, რაც ახლა ხდება თვითმმართველობასა და თვითმმართველ ქალაქებთან მიმართებაში, არის ევროპული მმართველობის საწინააღმდეგო ტენდენცია და აფერხებს სახელმწიფოს პროპორციულ განვითარებას, ვინაიდან თვითმმართველობის ფუნქციის დაკნინება პირდაპირპროპორციულია რეგიონების ეკონომიკურ ზრდასთან, თვითმმართველობის გარეშე წარმოუდგენელია ცივილიზებული, დემოკრატიული პოლიტიკური სისტემა, სახელმწიფო და სამოქალაქო ფუნქციონირება, ვინაიდან თვითმმართველობა არის უმთავრესი დემოკრატიული და პოლიტიკური პროცესი ქვეყანაში", - განაცხადა ეკა მიშველაძემ.
