„ადამიანის უფლებათა სახლის" ინფორმაციით, აზერბაიჯანელი ჟურნალისტი, აფგან მუხთარლი საქართველოში გაუჩინარდა.
ორგანიზაციის ცნობით, ის ბოლოს 29 მაისს, დაახლოებით 19:00 საათზე ნახეს თბილისში.
„ის დაემშვიდობა თავის მეგობარს, ვისაც ბარათაშვილის ქუჩაზე მდებარე კაფეში შეხვდა, დაურეკა მეუღლეს და უთხრა, რომ მალე მივიდოდა სახლში. თუმცა, ამის შემდეგ ის აღარავის უნახავს და მობილური გამორთული აქვს. როგორც მისი მეუღლე, ლეილა მუსტაფაიევა და მისი მეგობარი დაშგინ აღალარლი იუწყებიან, ბოლო პერიოდში, აფგან მუხთარლის უცნობი პირები, სავარაუდოდ აზერბაიჯანელები, უთვალთვალებდნენ", - ნათქვმია „ადამიანის უფლებათა სახლის" მიერ გავრცელებულ ინფორმაციაში.
ორგანიზაციის ცნობით, აფგან მუხთარლი აზერბაიჯანიდან დევნილი საგამოძიებო ჟურნალისტი და აქტივისტია, რომელიც ღიად გამოხატავდა აზერბაიჯანელი მთავრობის წინააღმდეგ მოსაზრებებს. 2015 წლის იანვრიდან ის საქართველოში ცხოვრობს, მის მეუღლესა და ქალიშვილთან ერთად, აფგანი თავისუფალ ჟურნალისტად მუშაობს.
