„ევროპულმა საქართველომ“ პარლამენტის რიგგარეშე სხდომა დატოვა, რომელზეც კონსტიტუციაში დაგეგმილ ცვლილებებს განიხილავენ. როგორც პარტიის ლიდერმა დარბაზის დატოვებამდე განაცხადა, ისინი უმრავლესობას საშუალებას აძლევენ, წყნარად მიიღონ ის ცვლილებები, რომელსაც მხოლოდ ერთი პარტია უჭერს მხარს.
”ჩვენ ჩვენი პოზიცია გამოვხატეთ, ჩვენ ქართველ ხალხთან ერთად დავაფიქსირეთ ჩვენი აზრი, შეკითხვები, წინააღმდეგობა. ამის იქით გვრჩება მხოლოდ მეორე მეთოდი საპარლამენტო პოლიტიკური ბრძოლის - შემდგომ განხილვაში მონაწილეობის აღარ მიღება, რასაც ”ევროპული საქართველო” აკეთებს. ამიტომ ვტოვებთ დარბაზს და უმრავლესობას საშუალებას მოგცემთ, ერთი პარტიის ხმებით ძალიან მშვიდად, წყნარად მიიღოთ ის ცვლილებები, რომელსაც მხარს უჭერს მხოლოდ ერთი პარტია საქართველოში”,- განაცხადა ბაქრაძემ.
კონსტიტუციაში დაგეგმილი ცვლილებების განხილვას დღეს ბოიკოტი „პატრიოტთა ალიანსმაც“ გამოუცხადა. ამის შესახებ პარლამენტში გამართულ ბრიფინგზე პარტიის ერთ-ერთმა ლიდერმა და პარლამენტის ვიცე-სპიკერმა ირმა ინაშვილმა განაცხადა.