დღეს ადამიანის უფლებათა დაცვისა და სამოქალაქო ინტეგრაციის კომიტეტი „საქართველოს ტერიტორიაზე მოძრავი უცხო სახელმწიფოში რეგისტრირებული ავტოსატრანსპორტო საშუალების მფლობელის სამოქალაქო პასუხისმგებლობის სავალდებულო დაზღვევის შესახებ“ კანონპროექტს განიხილავს.
განმარტებითი ბარათის თანახმად, კანონპროექტის მიზანია, დაარეგულიროს საგზაო–სატრანსპორტო შემთხვევის შედეგად წარმოქნილი სამოქალაქო ურთიერთობები, რომელიც წარმოიშობა საქართველოს ტერიტორიაზე მოძრავი უცხო სახელმწიფოში რეგისტრირებული ყველა სახის ავტოსატრანსპორტო საშუალებების მოძრაობისას, რა დროსაც ზიანი მიადგა მესამე პირის სიცოცხლეს, ჯანმრთელობას და ქონებას.
კანონპროექტი ადგენს სადაზღვევო სატარიფო განაკვეთების ოდენობას სადაზღვევო პერიოდისა და ავტოსატრანსპორტო საშუალების კატეგორიების მიხედვით. უფრო კონკრეტულად კი ცხრილში მაგალითისთვის წარმოდგენილია მსუბუქი ავტომობილის მფლობელის მიერ გადასახდელი სატარიფო განაკვეთები სადაზღვევო პერიოდის მიხედვით:
გარდა ამისა, კანონპროექტი ადგენს სადაზღვევო ლიმიტის ოდენობას ქონებისთვის მიყენებულ ზიანზე; ქონებისათვის მიყენებულ ზიანის ფარგლებს; სადაზღვევო ანაზღაურების ოდენობის დათვლის წესსა და დათქმას, როდესაც მზღვეველი თავისუფლდება სადაზღვევო ანაზღაურების გაცემის ვალდებულებისაგან.
როგორც კანონპროექტის განმარტებით ბარათშია აღნიშნული, სადაზღვევო ლიმიტების განსაზღვრის დროს გაითვალისწინეს, როგორც მსოფლიო ბანკის ექსპერტების გაცემული რეკომენდაცია, ასევე მეზობელი ქვეყნების გამოცდილება.
საქართველოს ტერიტორიაზე სავალდებულო დაზღვევის პოლისის გარეშე გადაადგილებისათვის ჯარიმას გასცემს საპატრულო პოლიციის დეპარტამენტი, ხოლო საზღვრის კვეთის დროს (საქართველოს ტერიტორიიდან გასვლისას) საბაჟო დეპარტამენტიც.
კანონპროექტის ინოციატორი საქართველოს მთავრობაა, ავტორი - საქართველოს დაზღვევის სახელმწიფო ზედამხედველობის სამსახური.
