მიანიჭებენ თუ არა მუსტაფა ემრე ჩაბუქს ლტოლვილის სტატუსს - ამ საკითხზე საბოლოო გადაწყვეტილებას ლტოლვილთა და განსახლების სამინისტრო 7 ივლისს მიიღებს. როგორც სამინისტროში ამბობენ, სამინისტრო საექსტრადიციო დოკუმენტაციის მიწოდებიდან ერთი თვის ვადაში ვალდებულია, მოამზადოს საბოლოო გადაწყვეტილება.
თბილისის საქალაქო სასამართლომ, პროკურატურის შუამდგომლობის საფუძველზე, მუსტაფა ემრე ჩაბუქს 25 მაისს სამთვიანი საექსტრადიციო პატიმრობა შეუფარდა.
დემირელის კოლეჯის დაკავებული მენეჯერის მოთხოვნის დაკმაყოფილებისა და ლტოლვილის სტატუსის მინიჭების შემდეგ მისი ექსტრადირების პროცესი შეწყდება. მუსტაფა ემრე ჩაბუქი ერთი თვეა, წინასაექსტრადიციო პატიმრობაში იმყოფება. ქართველმა სამართალდამცველებმა ის თურქული მხარის მოთხოვნით დააკავეს. თურქული მხარე მას ტერორიზმთან კავშირში ადანაშაულებს. მუსტაფა ემრე ჩაბუქი ბრალს არ აღიარებს.