დღეს, 29 ივნისს საქართველოს პარლამენტის რეგიონული პოლიტიკისა და თვითმმართველობის კომიტეტში "გირჩის" კანონპროექტის პირველო საკომიტეტო მოსმენა გაიმართა.
კანონპროექტის ძირითადი პრინციპების თაობაზე ზურაბ ჯაფარიძემ ისაუბრა და აღნიშნა, რომ ადმინისტრაციულ სამართალდარღვევათა კოდექსში ცვლილებების შეტანის მიზანია, აიკრძალოს, ადმინისტრაციული ორგანოს ან მისგან უფლებამოსილი პირის მიერ ავტომანქანების გადაყვანა საჯარიმო ავტოსადგომზე, საპატრულო პოლიციის მიერ ოქმის შედგენის გარეშე. პროექტის მიხედვით, ასევე მცირდება, კანონით გათვალისწინებული ჯარიმის ნებაყოფლობითი აღსრულებისთვის ვადის გასვლის შემდეგ, დასაკისრებელი საურავის ოდენობა.
"კანონპროექტის ავტორთა განცხადებით, თბილისში ძალიან ხშირად აქვს ადგილი „სითი პარკის“ თვითნებობას, რომლის დროსაც ადგილი აქვს ავტომანქანების საჯარიმო სადგომზე გადაყვანას მაშინაც კი, როდესაც ეს ავტომანქანები არც გზას კეტავენ და არც საავარიო სიტუაციას ქმნიან. ხშირ შემთხვევაში, იგი ასევე ტყუილად არიცხავს საურავებს მოქალაქეებს, რომლებსაც შეიძლება ჰქონდეს დარღვეული პარკირების წესი და შემდეგ ამ მოქალაქეების დიდ ნაწილს არ უღირს ენერგიის, დროის და რესურსების ხარჯვა იმაზე, რომ წავიდეს სასამართლოში, გაასაჩივროს „სითი პარკის“ გადაწყვეტილება და უკან დაიბრუნოს ეს ფული, ამის შედეგად კი „სითი პარკი“ უბრალოდ ძალიან დიდ მოგებას ნახულობს. ზურაბ ჯაფარიძის განცხადებით, „სითი პარკის“ მსგავს ქმედებებს მხოლოდ კანონმდებლობა თუ შეაჩერებს და სწორედ ამის გამო, საპატრულო პოლიციელის მიერ შედგენილი ოქმის გარეშე, უნდა აიკრძალოს იმ ავტომანქანების საჯარიმო სადგომზე გადაყვანა, რომლებიც დედაქალაქის ტერიტორიაზე პარკირების ადგილას დგანან ავტოტრანსპორტის პარკირებისათვის თვითმმართველი ერთეულის მიერ დადგენილი საფასურის გადახდის გარეშე, ან მაშინაც კი, როდესაც ავტომობილი გაჩერებულია ამკრძალავი ნიშნის „გაჩერება აკრძალული“ ან „დგომა აკრძალულია“ მოქმედების ზონაში." - ვკითხულობთ საქართველოს პარლამენტის ვებგვერდზე.
საქართველოს პარლამენტის ვებგვერდზე გავრცელებული ინფორმაციის მიხედვით, კომიტეტის წევრებმა ჩათვალეს, რომ საკითხი დამატებით შესწავლას საჭიროებს და ამ მიზნით, დაინტერესებული პირების მონაწილეობით, მუშა ჯგუფის შექმნის იდეაც წამოიჭრა, რომელიც კომიტეტის წევრებმა გაიზიარეს.