„რადიო თავისუფლების“ პორტალის, „კავკაზ. რეალიის“ ინფორმაციით, კვირას 16 ივლისს თბილისში ჩეჩენი ლტოლვილი და ბლოგერი ტუმსო აბდურახმანოვი დააკავეს.
აუდიოშეტყობინებაში, რომელიც ბლოგერმა „კავკაზ. რეალიის“ რედაქციაში გაგზავნა, ირკვევა, რომ იგი მეთვალყურეობის ქვეშ იმყოფება და საშუალება არ აქვს რედაქციის შეტყობინებებს ოპერატიულად უპასუხოს.
როგორც ბლოგერი ამბობს, ამ ეტაპზე რუსეთისთვის მისი გადაცემის საკითხი არ დგას. აბდურახმანოვმა მისი დაკავების მიზეზის დასახელებისგან თავი შეიკავა.
„ლიბერალი“ საქართველოს შინაგან საქმეთა სამინისტროსა და სახელმწიფო უსაფრთხოების სამსახურს დაუკავშირდა. ორივე მათგანი მათი უწყების მიერ თბილისში ტუმსო აბდურახმანოვის დაკავების ფაქტს უარყოფს.
„რადიო თავისუფლების" ცნობით, აბდურახმანოვი 2015 წლის ნოემბერში გაიქცა ჩეჩნეთიდან, სადაც ის ექსტრემისტების გაერთიანება „ისლამური სახელმწიფოსთვის“ სირიაში ბრძოლაში დაადანაშაულეს. ბლოგერის თქმით, იგი არასოდეს ყოფილა სირიაში. აბდურახმანოვი პოლიტიკურად მოტივირებულად მიიჩნევს მისთვის წაყენებულ ბრალდებებს.
საქართველოში მას 2016 წლის ნოემბერში უარი უთხრეს პოლიტიკურ თავშესაფარზე. აბდურახმანავმა გადაწყვეიტლება გაასაჩივრა და აცხადებს, რომ ჯერ არ არის დასრულებული მისი საჩივრის განხილვა.