საქართველოს მესამე პრეზიდენტი ტელეკომპანია „რუსთავი 2-თან“ ინტერვიუში უკრაინის მოქალაქეობის ჩამორთმევის საკითხზე საუბრობს. მიხეილ სააკაშვილი ამბობს, რომ მოქალაქეობის ჩამორთმევა პირდაპირ უკავშირდება უკრაინის პრეზიდენტის საქართველოში ვიზიტს, რომელიც ცოტა ხნის წინ შედგა.
"ოლიგარქისთვის, რომელიც მართავს უკრაინას პოროშენკოს სახით, ახმეტოვსითვის და სხვების, მათთვის ეჭვს არ წარმოადგენდა არასდროს, რომ მათი მთავარი პრობლემა ვიყავი მე, უბრალოდ ახლა საჯაროდ განაცხადეს და ეს უკვე ნათელი გახდა უკრაინისთვის. მე პატარა ბავშვი არ ვარ, საქართველოში ტყუილად არ ჩავიდა, ივანიშვილს ტყუილად არ შეხვდა, ბათუმში ტყუილად არ მოინდომა ჩასვლა იმიტომ, რომ ურეკში შევლა უნდოდა, ტყუილად არ ილაპარაკეს დიდი ხანი, რა თქმა უნდა რაღაცას გადადგამდნენ ნაბიჯს,"-აცხადებს სააკაშვილი.
გუშინ ცნობილი გახდა, რომ უკრაინის პრეზიდენტმა საქართველოს ყოფილ პრეზიდენტს მოქალაქეობა ჩამოართვა. ამასთან დაკავშირებით განმარტება უკრაინის საიმიგრაციო სამსახურმაც გააკეთა.
"კონსტიტუციის მიხედვით, უკრაინის პრეზიდენტი იღებს გადაწყვეტილებას უკრაინის მოქალაქეობის ჩამორთმევასთან დაკავშირებით კომისიის მიერ მიღებული გადაწყვეტილების საფუძველზე.
2012-2017 წლებში უკრაინის პრეზიდენტის ბრძანებულებით მოქალაქეობა ჩამოერთვა დაახლოებით 314 ადამიანს", - აღნიშნულია საიმიგრაციო სამსახურის განცხადებაში.
