„გუშინ გიორგი მარგველაშვილმა მორიგი შეურაცხყოფა მიაყენა მმართველი პარტიის ლიდერებს. კიდევ ერთხელ მოვუწოდებთ ყველას, არ აყვნენ მას და არ უპასუხონ მის შეურაცხმყოფელ განცხადებებს“ - ამის შესახებ განცხადებას ფრაქცია „ქართული ოცნება" ავრცელებს.
განცხადება პრეზიდენტის მიერ „რუსთავი 2-თან" ინტერვიუში გამოთქმულ მოსაზრებებს ეხება.
პრეზიდენტმა განაცხადა, რომ „ქართული ოცნებისთვის" ნებისმიერი განსხვავებული აზრი მიუღებელი და დასაცინია.
„კიროვის პარკის" შესასვლელთან დიდი პლაკატი იყო, რომლიდანაც ხელს ბრეჟნევი გვიქნევდა და ეწერა: პარტიისა და ხალხის ურღვევი ერთობა იყო და არის საწინდარი ჩვენი საზოგადოების უძლეველობისა. ეს იყო შეჯამება იმ აზროვნების, რომ მთელი სინდისი, ჭკუა, გამოცდილება, ხედვა და პატრიოტიზმი თავმოყრილია ერთ გუნდში და დანარჩენი ყველა ან უნდა იყოს ამ გუნდის მსახური, ან თუ არ ემსახურება, ბოლომდე არ მისდევს და ტაშს არ უკრავს, არის ქვეყნის დამაქცეველი, მტერი და რეტროგრადი. ეს არის აზროვნების ის ფორმა, რომელიც ჩვენ, სამწუხაროდ, ვერ გადავძლიეთ და მუდმივად, პარტია, რომელიც მოიპოვებს უმრავლესობას, მისთვის ნებისმიერი განსხვავებული აზრი არის მიუღებელი და დასაცინი” - თქვა მარგველაშვილმა.
