„ლიბერალს“ შსს-ში განუცხადეს, რომ ექსპერტიზის პირველადი მონაცემებით, ბათუმში გარდაცვლილ ორ ახალგაზრდას ძალადობის კვალი არ აღენიშნება. ჯერჯერობით, უცნობია, როდის იქნება ექსპერტიზის საბოლოო შედეგები.

დღეს, 8 აგვისტოს, ბათუმში, ხიმშიაშვილის ქუჩაზე, ერთ-ერთი საცხოვრებელი კორპუსის მე-9 სართულზე ორი ახალგაზრდა ბიჭის ცხედარი იპოვეს. 

როგორც მედიასაშუალებები, მათ შორის „ინტერპრესნიუსი“ ავრცელებს ინფორმაციას, ერთ-ერთს, სავარაუდოდ, ყელი ჰქონდა გამოჭრილი და ძალადობის კვალი აღენიშნებოდა. 

„ლიბერალს“ ბათუმის სასწრაფო სამედიცინო დახმარების ცენტრში აღნიშნული ინფორმაცია არ დაუდასტურეს. ძალადობის კვალის დასადგენად ახალგაზრდების ცხედრებს ექსპერტიზა უტარდება. ყელის გამოჭრის ფაქტს ამ ეტაპზე არ ადასტურებენ შსს-შიც.

„იქ ყელის გამოჭრის ფაქტი არ არის დაფიქსირებული, 4 დღე გასული იყო, ძალადობის კვალის დადგენა ზედაპირული დათვალიერებით შეუძლებელი იქნებოდა, გადაყვანილები არიან ექსპერტიზაზე“, - აცხადებენ სასწრაფო სამედიცინო დახმარების ცენტრში.

შსს-ს ინფორმაციით, გამოძიება 115-ე  მუხლით (თვითმკვლელობამდე მიყვანა)  მიმდინარეობს.