საქართველოს ელექტროენერგიისა და წყალმომარაგების მარეგულირებელი კომისიის სხდომა ხმაურის გამო შეჩერდა. სხდომათა დარბაზში „ლეობორისტული პარტიის“ წევრებმა მჯდომარე აქცია დაიწყეს. მათი თქმით, სემეკი გეგმავს, რომ ელექტროენერგიაზე ტარიფი გაზარდოს.
„თელასმა“, ელექტროენერგიის განაწილების, გატარებისა და მოხმარების ტარიფების დადგენის მიზნით, სემეკს სატარიფო განაცხადით მიმართა. სემეკის განმარტებით, საუბარია ტარიფის ყოველწლიურ გეგმურ გადახედვაზე და ეს არის საჯარო ადმინისტრაციული წარმოების დაწყების პროცესი, რომელიც გულისხმობს მხოლოდ თარიღების განსაზღვრას, რა პერიოდში უნდა მიღოს კომისიამ გადაწყვეტილება. სემეკის წევრებმა საკითხს კენჭი უყარეს. კომისია „თელასის“ განაცხადის შესახებ გადაწყვეტილებას 150 დღის ვადაში მიიღებს.
ფოტო: „რუსთავი 2“