„საქართველოს რკინიგზის“  შენობასთან აქცია „რკინიგზა რკინიგზელებს!“  იმართება.  15 აგვისტოს საქართველოს რკინიგზის თანამშრომლებმა შიმშილობის აქცია დაიწყეს. მათი თქმით, სამუშაო ადგილი და პირობები ადმინისტრაციამ შეთანხმების გარეშე შეუცვალათ. 

ამჟამად შიმშილობს 8 ადამიანი, მათ შორის არიან რკინიგზელთა ახალი პროფკავშირის წარმომადგენლები. მათი მოთხოვნებია: დაუყოვნებლივ დაბრუნდნენ გათავისუფლებული თანამშრომლები სამსახურში; რკინიგზა დატოვონ საქართველოს რკინიგზის საზოგადოებასთან ურთიერთობის სამსახურის უფროსმა დაჩი ცაგურიამ და ინფრასტრუქტურის სამსახურის უფროსმა ვასილ ხორავამ; შესრულდეს წინა გაფიცვების შედეგად მიღწეული შეთანხმებები.

სოლიდაროის ნიშნად აქციას შემოუერთდნენ პროფკავშირის წარმომადგენლები ჭიათურიდან, ზესტაფონიდან და მინის ქარხნიდან.

რკინიგზის ახალი პროფკავშირის თავმჯდომარემ, ვიტალი გიორგაძემ აქციის მონაწილეებს მიმართა. მისი თქმით, ერთ-ერთ მოშიმშილის ოჯახის წევრებზე განხორციელდა ფსიქოლოგიური ზეწოლა სხვადასხვა სამსახურებიდან.  

„მას შემდეგ, რაც დაიწყო შიმშილობა და მასში მონაწილობდა 2 ადამიანი, ერთ-ერთ მათგანზე განხორციელდა ზეწოლა. უფრო კონკრეტულად, ამ ადამიანის ძმის ოჯახზე სხვადასხვა სამსახურებიდან განხორციელდა სერიოზული ფსიქოლოგიური ზეწოლა.

მესამე დღეს, როცა რეალურად ერთი მოშიმშილე დარჩა და რკინიგზა მას ყურადღებას არ აქცევდა, დაკავებული იყო პროვოკაციული განცხადებების გავრცელებით, პროფკავშირმა მიიღო გადაწყვეტილება ამ ერთ ადამიანთან ერთად დამჯდარიყო საშიმშლოდ“,- განაცხადა ვიტალი გიორგაძემ.

მისი თქმით,  2013-2014 წლებში რკინიგზამ ხელი მოაწერა შეთანხმებას, რომლისგანაც არაფერი შესრულებულა. 

„მე მივმართავ რკინიგზას, ის პოლიტიკა, რომელსაც თქვენ აწარმოებთ, ანგრევს რკინიგზას და აზარალებს ქვეყანას.  ეს არის სახელმწიფო ორგანიზაცია და  ყველა ის განცხადება, რომელიც გაკეთებულია რკინიგზის მენეჯმენტისგან, პირდაპირ აღიქმება, როგორც მთავრობის გაკეთებული განცხადება, იმიტომ რომ ესენი არიან დანიშნულნი სახელმწიფოს მხრიდან და ჩვენთვის არავის უკითხავს ამ ადამიანების დანიშვნა. ჩვენ ვიბრძოლებთ ჩვენი უფლებებისთვის“,-  თქვა ვიტალი გიორგაძემ.