უკვე რამდენიმე საათია შიდა ქართლში, გორის მუნიციპალიტეტის სოფელ ბოშურის მიმდებარე ტერიტორიაზე ტყეში ხანძარია. შემთხვევის ადგილზე თავდაცვის მინისტრი ლევან იზორია ჩავიდა.
მისი განცხადებით, წინ მიიღეს გადაწყვეტილება, რომ სალიკვიდაციო სამუშაოებში თავდაცვის უწყების შენაერთებმაც მიიღონ მონაწილეობა. შესაბამისად, რამდენიმე წუთში ბოშურის მიმდებარედ შემთხვევის ადგილზე სტიქიის ზონაში თავდაცვის სამინისტროს გორის პირველი ქვეითი ბრიგადის 250 ჯარისკაცს ელიან.
სტიქიის ზონა საკმაოდ რთულ რელიეფზე მდებარეობს, რის გამოც სპეციალური სატრანსპორტო საშუალებებით გადაადგილება ამ ტერიტორიაზე პრაქტიკულად შეუძლებელია. შესაბამისად, ხანძარს ძირითადად ქვეითები ებრძვიან.
ამ ეტაპზე ერთობლივად მიღებული გადაწყვეტილებით, მიიმდინარეობს სპეციალური თხრილების მოწყობა იმისთვის, რომ მოხდეს ცეცხლის შემდგომი გავრცელების თავიდან აცილება.
თავდაცვის მინისტრის, ლევან იზორიას განცხადებით, აღნიშნულ კერაზე ხანძრის სრული ლიკვიდაციის შემდეგ თუ ბორჯომის მიმდებარე ტერიტორიაზე ხვალისთვისაც შენარჩუნდება ხანძრის კერები, თავდაცვის უწყება დანაყოფების მობილიზებას აღნიშნულ ტერიტორიებზეც მოახდენს და შესაბამისად სალიკვიდაციო სამუშაოებში სამცხე-ჯავახეთის ტერიტორიაზე ჩაერთვება.