„დღეს დილით, დაახლოებით 7.30 საათზე ბათუმში პოლიციამ დააკავა "თანასწორობის მოძრაობის" აღმასრულებელი დირექტორი, ლევან ბერიანძე და გამგეობის წევრი, თორნიკე კუსიანი“,- აღნიშნულ ინფორმაციას „თანასწორობის მოძრაობა“ ავრცელებს.  

როგორც მათ „ფეისბუქ“ გვერდზე ვკითხულობთ, დაკავებულებისგან მიღებული პირველადი ინფორმაციით, მათზე განხორციელდა ფიზიკური ძალადობა და სიტყვიერი შეურაცხყოფა პოლიციის მიერ ჰომოფობიური ნიადაგზე.

მათ ბრალი საქართველოს ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (პოლიციის კანონიერი მოთხოვნისადმი დაუმორჩილებლობა) მუხლით აქვთ წაყენებული.

იურისტ ნინო ბოლქვაძის ინფორმაციით, მათ ამის შესახებ შსს-ს გენინსპექციას უკვე აცნობეს და მათგან სასწრაფო რეაგირება მოითხოვეს.

როგორც „ლიბერალს“ სახალხო დამცველის აპარატიდან აცნობეს, ამჟამად მათთან სახალხო დამცველის წარმომადგენლები იმყოფებიან და ვიზიტის დასრულების შემდეგ გაირკვევა, რა მდგომარეობაში არიან ისინი. დაკავებულთა უფლებებს საიას იურისტი, გიორგი ხიმშიაშვილი დაიცავს.