სახელმწიფო შესყიდვების სააგენტოს ვებგვერდზე გამოქვეყნებული ინფორმაციის თანახმად, დ.შევარნაძის სახელობის ეროვნულ გალერეაში დაგეგმილია ქ. ტურინის საბაუდას გალერეაში დაცული მსოფლიო შედევრის, სანდრო ბოტიჩელის „ვენერას“ გამოფენა.
ეროვნული მუზეუმის გენერალური დირექტორის მოვალეობის შემსრულებლის, ირაკლი ღვალაძის წერილის მიხედვით, ეროვნული მუზეუმი გამოფენის ორგანიზებისთვის გამარტივებული შესყიდვის გამოცხადებას მოითხოვს. წერილში აღნიშნულია, რომ გამოფენის ორგანიზება 75 000 ევრო დაჯდება და ის ასოციაცია „მეტამორფოზამ" უნდა განახორციელოს.
წერილში ასევე ნათქვამია, რომ ეროვნულ გალერეაში გამოფენა 2017 წლის 3 ოქტომბერს უნდა გაიხსნას და ის 30 ნოემბრამდე გაგრძელდება, რაც იტალიის ეკონომიკური განვითარების მინისტრის მოადგილის, ივან სკალფაროტოს თბილისში ვიზიტს ემთხვევა.
გამოფენა საქართველოში იტალიის საელჩოს, ტურიზმის ეროვნულ ადმინისტრაციასა და კულტურის სამინისტროს მხარდაჭერით ხორციელდება.